KHAWTHLIR

ZLP secretary & treasurer thlang

Mizoram sorkara rorel lai ZPM chuan nimin khan Assembly recess room-ah ZPM Legislature Party secretary leh treasurer tur an ruat. ZLP secretary atana ruat chu TBC Lalvenchhunga a ni a, treasurer atana ruat chu Lalchhuanthanga a ni. December 5, 2023 zan khan leader leh deputy leader an lo thlang tawh a, leader chu Lalduhoma niin, K Sapdanga chu deputy leader a ni.

Chhawmdawlna hlan

KṬP branch hrang hrangte'n Synod Hospital Charity Fund puala inkhawm ṭum khat thawhlawm an chhûn khawm Rs 11,81,930 chu nimin khan Central KṬP hruaitute'n Synod Hospital director Dr Lalṭhakima hnenah an hlan. Grace Home chawchhûm hlawh tur Rs 96,000 an hlan nghal bawk.

NCC-in thisen pe

NCC 2 Mizoram Battalion chuan nimin khan Sazaikawn Sports Complex-ah thisen pek an huaihawt a, Civil Hospital, Lunglei tan thisen unit 10 an pe a, mipa vek an ni.

Duhsakna hlan

ZPM party chuan thuchhuah siamin, 9th Mizoram Legislative Assembly ṭhutkhawm vawi khatna ṭan a ni leh speaker atan chuhtu dang awm loa Lalbiakzama thlan tlin a ni chu lawmawm an tih thu an tarlang a, "Pu Lalbiakzama hian House zahawm tak hi dik tak leh fel fai tak, thlei bik leh duhsak bik nei loa a kaihhruai theih nan leh House zahawmna a vawnhim zel theih nan duhsakna kan hlan," an ti.

MAL President

Mizo Academy of Letters chuan nimin khan Central YMA Hall-ah kum tawp intawhkhawm hun an hmang a, kum 2023-2025 chhunga office bearer turte an thlang. President atan Prof. RL Thanmawia leh general secretary atan Dr Zoramdinthara an thlan bakah, OB dang pali an thlang a ni.

Zirtir dawn

Serchhip DC David Lalthantluanga hoin nimin khan DC conference hall-ah Serchhip district-a Viksit Bharat Sankalp Yatra kalpui dan tur sawiho a ni. Viksit Bharat Sankalp Yatra atan hian Serchhip district-ah lirthei pakhat tirh a ni dawn a, December 18, 2023 aṭanga January 26, 2024 thleng Serchhip district-a khaw hrang hrangah lirthei hmanga zin kualin, sorkar hotute leh sorkar scheme kaihhnawiha mi pawimawhte'n sorkar scheme-te mipui an zirtir dawn a ni.

Damdawi dawng

Khawzawl bawrhsap K Lalrohlua chuan December 11, Thawhṭanni khan New Delhi-a pawl pakhat, Every Infant Matters aṭangin vitamin A mûm 1,00,000 leh rúlhút hlo (deworming tablet) mûm 1,50,000 a dawng a, a vaiin Rs 16,00,000 man a ni. Damdawite hi a mamawhte hnenah a thlàwna sem chhuah vat tum a ni.

Tanpuina sem

Champhai Officers’ Club chuan nimin khan Champhai District Hospital leh District Jail bakah, Champhai khawpuia home pakua hnenah Krismas pualin an member-te thawh khawm Rs 82,000 an sem. Home an ṭanpuite chu - Rose Childrens' Home, Observation Home, Genesareth Chirldrens Home, Swadar Greh Home, Metakhen Reformation Centre, Grace Receivers' Home, Mazuia Memorial Home (TNT), Emmanuel After Care leh Gosen Home-te a ni.

High School Games

Mizoram Secondary School Games vawi 40-na chu nimin khan Aizawla infiamna hmun hrang hrangah ṭan a ni a, December 15, 2023 thleng a awh ang. Secondary School Games-ah hian district 11 aṭangin zirlai leh zirtirtu 1,000 vel an tel a; athletics, badminton, basketball, football, table tennis leh volleyball-ahte zirlaite an inel dawn a ni.