Governor-in Assembly House-ah thu a sawi : Kan economy dinhmun a hlauhawm - Larsap
Nimina Assembly session-ah Governor Dr Hari Babu Kambhampati chuan thu sawiin, Mizoram sorkarin awmze nei takin eirûkna a do dawn thu a sawi a; sum dinhmun chungchangah, "Kan economy hi dinhmun hlauhawmah a ding," a ti.
Governor chuan, sum hman nasat vanga sum pûk tam lutuk chuan a ṭha lo zawngin nghawng a neih thu sawiin, "Chu chuan kan economy hi dinhmun hlauhawmah a dah a ni. Central-in sum a sem tlahniam leh chhiah kan hmu tlemin harsatna hi a belhchhah," a ti a; Mizoram sorkarin sum dinhmun siamṭha turin theihtawp a chhuah dawn thu a sawi.
Sorkarin inrenchemna a kalpui dawn tih sawiin Larsap chuan, "Inrenchemna kawngah hian hotu sang aṭangin bul ṭan a ni dawn a, Chief Minister leh minister-te pawh a huam vek ang. Sum deh chhuahna lam zawn hi ngaih pawimawh hmasakah neih a ni dawn a, Mizoramin hma a sawn theihna atan theihtawp chhuah a ni ang," a ti.
Dr Hari Babu Kambhampati chuan, loneitute tan budget-ah sum dah a nih dawn thu sawiin, "Kumin sorkar kum aṭangin sawhthing, aieng, hmunphiah leh hmarchate lei ṭan nghal a ni ang. Ṭhalaite tan kutkawih eizawnna leh bulṭanna hmangin ṭhalaite tan hnathawh tur ngaihtuahsak a ni ang," a ti a, bána kaih policy kalpui a nih tur thu a sawi.
Sorkar ṭhaah eirukna a tlahniam ṭhin tih sawiin Kambhampati chuan, "Mizoram sorkarin eirukna a do dawn a, a fihlim lote lakah zahngaihna a lantir dawn lo. Eirukna hi awmze nei taka do a ni dawn. Eirukna dona atan a pawimawh avangin Central Bureau of Investigation (CBI) hnenah general consent pek a ni ang," a ti.
Governor chuan, Mizoram inthlanpuiah mi tam tak an tel thu sawiin, "Vote 80.43% lai a tla a, hei hian a hma aiin Mizoram mipuite'n inthlan an ngaihven sawt tih a tilang," a ti a; mipuite'n an rualawhna hriatthiampui thei ber tura an ngaih sorkar thlan kawngah an mawhphurhna an hriat thar avangin lawmawm a tih thu a sawi.
Larsap chuan MLA atana thlan tharte duhsakna hlanin, "A bik takin, a vawi khatna atana thlan tlin member 23-te ka lawmpui hle. Hmeichhe pathum MLA atana thlan tlin an ni hi Mizoram history-ah a la awm ngai lo a, Mizorama hmeichhiate hlawhtlinna ropui tak a ni. State puma hmeichhiate tan phùrna thar a pek ngei ka ring," a ti.
Inthlanna zalen leh felfai neih a nih theihna tura sorkar hnathawk, a bik takin dan leh thupek kengkawhtute inpekna fakin Larsap chuan, "Tlawmngai pawl, kohhran leh mipui thlawpna a ropui," a ti a, inthlana Mizoram People's Forum-te hnathawh chu ṭha a tih tak zet thu a sawi.
Hari Babu Kambhampati chuan, inthlan result-in mipuite'n kalphug thar an duh tih a tihlan thu sawiin, "Democracy kalphung inthlak danglamna kawngah kan mipuite rinna nghet tak a lantir," a ti.
Governor chuan, Mizoram sorkar thlawp tlat tura mipui sáwmin, "Kan ṭanho phawt chuan Mizoram hi India rama state hmasawn berte zingah kan siam thei ang tih ka ring tlat a ni," a ti a, House member leh Mizoram mipui zawng zawngte Krismas leh kumthar chibai a buk bawk.
SORKAR NGAIH PAWIMAWH TUR GOVERNOR-IN A SAWI ṬHENKHAT
▶ Sorkar ṭha, inrelbawlna ṭha tak hnuaia mipui tana hnathawk, langtlang leh innghahna tlak siam.
▶ Sector zawng zawngah hmasawnna ngelnghet siam tura hmalak.
▶ Industry sector lama ṭan lak.
▶ Mi tin ban phaka social security chhawp leh khua leh tuite mamawhna ang zawn zela hmalak.
▶ Ṭhalaite tana hamṭhatna leh hmasawnna buatsaih.
▶ Kan chhehvel min hualtu boruak, thing leh mau, leilung, nungcha, etc. venhim leh humhalh.
▶ Khuarei thlenga kan chhawr tur leh hlawkpui tur hmasawnna ruhrel din.