KHAWTHLIR

Planning Board Vice Chairman

Governor Dr Hari Babu Kambhampati chuan nimin khan chief minister Lalduhoma rawtna angin Mizoram State Planning Board vice chairman atan Dr Kenneth Chawngliana a ruat. Planning Board vice chairman hi cabinet minister rank a ni a, cabinet minister-in hamṭhatna an dawng angte a dawng thei a ni.

Dy. Chief Whip-ah W Chhuanawma ruat

Chief minister Lalduhoma chuan nimin khan deputy government chief whip atan W Chhuanawma a ruat. MLA inthlan neih zawh takah khan W Chhuanawma hi ZPM ticket-in Tuichang bial aṭangin MLA atana thlan tlin a ni.

Thisen pe

Lunglei Higher Secondary School NSS chuan nimin khan an sikulah thisen pek rûnpui an huaihawt a, Lunglei Civil Hospital tan thisen unit 60 an pe a, petute mipa 44 leh hmeichhia 16 an ni. ṬKP, Nazareth Unit, Lawngtlai pawhin nimin khan Lawngtlai District Hospital tan thisen unit 36 an pe a, petute mipa 28 leh hmeichhia pariat an ni.

Dialysis room hlàn

Synod Hospital-a Dialysis pindan thar chu nimin khan damdawi-in chaplain Rev. HC Khaicho-a'n Pathian hnenah a hlan. Hlanna inkhawm hi Synod Hospital director Dr Lalṭhakima'n a kaihruai a, coordinator Upa Lalrinmuana tarlan danin, dialysis khawl thar lei nan leh a dahna tur pindan siam nan Rs 29,34,780 hman a ni. Synod Hospital Dialysis Unit hian dialysis khawl pasarih a nei mek a, kum 2023 chhungin dialysis vawi 2,331 tih tawh a ni.

Roll tlangzarh

Mizoram State Election Commission thupek angin Aizawl district huam chhung Dawrpui Vengthar Local Council Electoral Rolls Summary Revision, 2023 neih a ni a, final roll chu nimin khan Aizawl addl. DC Issac C Lalrempuia'n DC conference hall-ah a tlangzarh a, political party aiawhte hnenah a hlan nghal.