CM-in Union Finance Minister a kâwm
Chief minister Zoramthanga chuan nimin khan New Delhi-ah Union Finance minister Nirmala Sitharaman leh Jal Shakti minister Gajendra Singh Shekhawat te an pisaah a kâwm a, Mizoram mamawhte a thlen.
Chief Minister hian Finance Minister hnenah, external aided project hrang hrangte pawm tura file kalkawng thui lutuk ṭhin titawi tura rawtna a thlen tawh anga Department of Economic Affairs-in kalphung awlsam zawk a siam chu lawmawm a tih thu a hrilh.
Non Lapsable Central Pool of Resources (NLCPR) hnuaia India hmarchhak state-te tana hmasawnna hna thawhna tur sum dah chu tunah eng emaw zat Ministry of DONER leh North Eastern Council (NEC) hnena pek chhuah a awm loh chungchangah Zoramthanga chuan, financial year 2020-21 chhung ngeia hmarchhak state tihhmasawn nan sum pe turin Finance Minister a ngen.
Chief Minister chuan, CRF (state roads) kalphung thlak vanga project kalpui tawh tangkhang mek a awm thu a sawi a, direct-a state hnena sum dah a nih theih nan hma laksak turin Sitharaman a ngen. Finance Minister chuan, India hmarchhak state-te tihhmasawn chu sorkar laipuiin a ngaih pawimawh thu sawiin, Chief Minister thu thlente chu theihtawpa a lo bawhzui tur thu a hrilh. Jal Shakti Minister nen an inkawmnaah CM Zoramthanga chuan, tuna tui connection siam kawnga hmalakna kal mek, Functional Household Tap Connection (FHTC) atan sorkar laipuiin Mizoram tana sum a dahin a daih loh thu a sawi a, sum mamawh belh zat tur a thlen nghal.
Chief Minister hi Planning Board vice chairman H Rammawi, chief secretary Lalnunmawia Chuaungo leh PHE secretary Amjad Tak leh Planning Secretary Dr C Vanlalramsangaten an
ṭawiawm a ni.