NIT-ah thil dik lo a awmah ngai

Mizo Zirlai Pawl (MZP) hruaitute chuan nimin khan Aizawl Press Club-ah thuthar thehdarhtute an kâwm a; National Institute of Technology (NIT), Mizoramah thawktute inawp dan, sum leh pai hman dan leh thawktu lak danah thil fel lo tam tak inphûm a awma an hriat thu an sawi.

MZP president H Lalthianghlima chuan, Mizoramin technical institute lian a neihah an beisei loh thil tam tak tun hnaiah an hmu tih a sawi a, "Institution inawp danah te, sum leh pai hman danahte leh thawktu lak danahte thil fel lo tam tak inphûm ru a awmin kan hria a, pawi kan ti tak zet. Sum hman dan felfai tawk lo a tam a, CBI pawhin an chhui ngai hial khawpin sum an hman dan a fel lo," a ti.

NIT Mizoram hmunhma thar tur Lengpuia mi lungphum chu October 13, 2012-ah phûm a ni tawh tih sawiin H Lalthianghlima chuan, "Tun thlengin hei hi sak puitlin a la ni lo. Technical zirna-in ṭha Mizoramin kan neih chhun, lungphùm phùm aṭanga kum 11-ah pawh sak puitlin a ni lo hian ngaihsak a hlawh lohzia a tichiang hle," a ti a; Chaltlanga NIT in luah hrang hrangah sum leh pai tam tak sen ral ṭhin a nih thu a sawi.

MZP President chuan, NIT, Mizorama hna lak ṭhenkhat chu a dik tâwk loa an hriat thu sawiin, "Induhsakna uchuak leh tih tlin tum nei sa ràna lak a awm tih hriat a ni. Advertisement chhuah rual vek ni si, post ṭhenkhat chauh lak te, Board of Governor-in appointment approve an pek hmaa appointment order rang taka tihchhuah te, exam ṭhenkhat observer tel loa exam-te a awm," a ti a; advertisement chhuah tawh tam tak tun thenga la lak lohte chu mak an tih thu leh a mawhphurtu chhui zui zel an tum thu a sawi bawk.

MZP TARLAN ṬHENKHAT

■ NIT-a hna lak felfai loh vangin candidate ṭhenkhat High Court hial an thleng a, hei hian hna lak felfai lohzia a tarlang.

■ Thawktu ṭhekhatte'n an hnuaia thawkte an duh ang anga an tih theih loh avangin an vau ṭhin nia sawi a awm a, bàna invaunate hi a ṭha lo kan ti.

■ Non teaching staff-te kaisan theih nan Ministry-ah post sanction tura hmalakna lian tham a awm ngai loa hriat a ni. Hetih lai hian zirtirtu erawh an theihna (eligibility)-in a pha lo chunga grade pay zuan khûma promotion pek an awma hriat a ni.

■ Zirlaite tana bus hman (hire), bill pek theih loh vanga hun rei tak tak zirlaite kal velna bus tlân thei lote zirnain a tuar hle.

■ RTI Act hmanga NIT inrêlbàwl dan chungchanga hriat duh kan neih te kan zawhna min chhan danah kan lawm lo.

■ RTI Act hmanga zawhna an chhang mumal thei lo hian an institution inawpna felfai lohzia a tarlang.

■ NIT-a thawktute chhiatni leh ṭhatni bakah, an dikna chanvote humhalh turin tun thlenga staff welfare din a ni lo hi ṭha lo kan ti.