MPSC tichak loa MSSSB ṭhiah ṭha ti lo

Mizo Zirlai Pawl (MZP) Gen.Hqrs chuan, Mizoram sorkarin Mizoram Subordinate Service Selection Board (MSSSB) ṭhiat a, Mizoram Public Service Commission (MPSC) kuta hna lak zawng zawng a dah tur chu ṭha lo an tih thu an tarlang.

Sorkarin MSSSB a ṭhiah tur chungchangah nimin khan MZP Executive Committee an ṭhutkhawm a, MZP president H Lalthianghlima chuan, "Sorkarin ni 100 chhunga ṭhiah tura a dah ngawt mai hi zirchianna kan nei dawn a; MSSSB thlak thei tur emaw, MPSC tihchakna emaw a siam a nih loh chuan MPSC kuta MSSSB hna lak ṭhin zawng zawng a dah tur hi ṭha lo kan ti," a ti a, sorkarin MSSSB ṭhiah a tum dan chu an zir chian dawn thu a sawi.

MPSC tihchakna emaw a awm si loha MSSSB hna lak zawng zawng MPSC kuta dah vek chu ṭha lo an tih thu sawiin MZP President chuan, "Tun hma anga MPSC kuta hna lak zawng zawng a awm leh ringawt chuan hna lak a muang leh dawn a, hei hi ṭhalaite'n an duh lo a ni," a ti.

MSSSB thlakna tur emaw, MPSC tihchakna tur ruahmanna emaw sorkarin a neih chuan MSSSB ṭhiah chu pawi an tih loh thu a sawi bawk.