Krismas leh kumthar vuakvet atana dan leh thupek kenkawh dan tur sawiho

Mamit leh Saitual DC-te leh Ngopa SDO (Civil) kaihhruaiin nimin khan an huamchhung ṭheuha Krismas leh kumthar vuakveta dan leh thupek kenkawh dan tur sawiho a ni a; sorkar hotu te, khawtlang hruaitu te, tlawmngaipawl aiawhte leh thuthar thehdarhtute an tel.

Mamit district hotute ṭhukhawm chuan, halpuah, halmawi, silai lem a mu nei chi hralh leh lei khapna bawhzuina atan a zuartu dawrte check ni se, Mamit khawpui lun laiah duty post siam leh ni se, rukruk a hluar avangin police patrolling uar zawka kalpui leh ni se, an ti a; rukru leh dan bawhchhia man chhuah vat an nih theih nan veng tinah CCTV vuah tura hmalak an rêl. Krismas leh kum thar chhung hian emergency case awm palh theiah District Hospital, Mamit chu in ralring tura beisei an ni bawk.

Saitual District Level Committee (DLC) chuan, Probitary Order Under 144 CRPC-in a sawi angin mipuite'n ralmuang taka Krismas leh kum thar hunpui an hman theih nan ruihhlo leh a kaihhnawih hralh leh lakluh laka inven dan tur te,silai lem leh puakthei thil, halmawi lam chi reng reng khap tur a nih thu leh hemi chungchang hi veng tinah VC leh YMA-te'n a zau thei ang berin puang darh se, an ti a; no tolerance week leh mobile patrolling neih a nih tur thu tarlan a ni.

Ngopa SDO (Civil) leh sub-divisional magistrate H Lalramliana hoa police, kohhran leh khawtlang hruaitute ṭhukhawm chuan, Krismas leh kum thar vuakvetah boruak ralmuang tak hnuaia zalen taka mi tin an awm theih nan chak lutuk leh rui chunga lirthei khalhte chungah dan anga action lak zel ni se, Ngopa khua bikah emergency thil ni lo chu darkar khatah km 20 aia chaka lirthei khalh loh ni se an ti. Ruihtheih thil leh ruihhlo lakluh leh zawrh khapna dan ding lai chu khauh lehzuala ken kawh an rel bawk.