Mitdel khawlaia zâite hamṭhatna tur Mizoram sorkarah rawtna thlen tum

Mizoram Blind Society (MBS) chuan, khawlaia zâi ṭhin mitdelte'n dan anga Mizoram sorkar aṭanga a bika hamṭhatna an hmuh theih nan Mizoram sorkarah rawtna thlen an tum.

December 12, Thawhlehni khan Whitestone Conference Hall-ah Annual General Body Meeting hmangin ro an rel a; mitdelte dikna chanvo leh hamṭhatnate an zirho nghal. MBS adviser Lalbuatsaiha'n a kaihruai a, Persons with Disabilities (PwD) commissioner Vanlaldiki Sailo khuallian a ni.

MBS hian mitdel eizawnna mumal neih loh vanga khawlaia zâi ṭhinte'n Rights of Persons with Disabilities Act, 2016 Chapter 7 tlawhchhanin Mizoram sorkar aṭanga a bika hamṭhatna an hmuh theih nan Mizoram sorkarah rawtna thlen an rêl a; MBS member mitdel khawsak harsate tana Mizoram sorkar leh bank kaltlanga health care facility mumal leh rintlak siam a nih theih nan hmalak an rêl a ni.

Mizorama rualban lohna hrang hrang neite tana zirna, eizawnna leh hmasawnna hrang hrangahte rualbanlo zawng zawng huap zo leh a taka hman theih policy siam a nih theih nan Mizoram sorkarah rawtna thlen an rêl a; Mizorama open school, IGNOU leh correspondence course-a mitdel zirlaite'n zirna hmanrua awlsam leh mumal zawk an neih theih nana hmalak an rêl bawk.

PwD Commissioner chuan, MBS hmalaknate ṭha a tih thu sawiin, hmasawn zawnga ṭan la zel turin a fuih a; Mizoramah rualbanlote tan hmasawnna tam tak awm tawh mah se, India rama state dangte khaikhinin hmalakna tur tam tak a awm thu a sawi.