Ráltlân tan theihtawp chhuah turin MNF-in Mizoram sorkar an ngen

MNF party chuan thuchhuah siamin, Myanmar, Bangladesh leh Manipur aṭanga Zo hnahthlak Mizorama ráltlânte tan theihtawp chhuah turin Mizoram sorkar an ngen.

MNF chuan, Pathian leh mipui duh dan angin ZPM kaihhruai sorkar a piang tih tarlangin, "Sorkar hmasain theihtawp a lo chhuahpui tawh angin kan unau raltlante tan theihtawp chhuah chhunzawm turin ZPM sorkar kan ngenin kan chah a ni," an ti.

Myanmar, Bangladesh leh Manipur-a Zo hnahthlakte'n an nunna humhim turin Mizoram an rawn pan tih sawiin MNF chuan, "Myanmar leh Bangladesh aṭanga rawn lutte phei chu thawn lêt turin India sorkarin na takin Mizoram sorkar rawn nawr mah se, kan unau, kan thisen zawmpuite chu MNF kaihhruai sorkar khan a lo hum a, mipuite nen ṭangkawpin ei leh in, chenna leh thuamhnaw bakah zirna thlengin a pe a ni," an ti a, an tan huaisen takin sorkar a din thu an tarlang.

MNF chuan, Zo hnahthlak raltlante an chenna hmun rálmuang a nih a, zalen taka nun an hman leh theih hma chu thlamuang taka Mizorama an awm zel theih nan hma la tur leh an mamawh angte pe chhunzawm zel turin Mizoram sorkar an ngen a, "Zo hnam inpumkhatna kawnga huaisen taka pa chan changa a din chhunzawm zel a beisei a ni," an ti.