MKHC chairman thar atan Rev. R Vanlalnghaka

Mizoram Kohhran Hruaitute Committee (MKHC) chuan nimin khan Synod Office-a Devotion Hall-ah General Meeting vawi 29-na an hmang a, president thar Rev. R Vanlalnghaka'n mawhphurhna a la ṭan.

MKHC ṭhutkhawm hi chairman Rev. Dr C Chawnghmingliana'n a kaihruai a, report hrang hrang ngaihthlak a nih bakah, rorel a ni. Rorelnaah hian MKHC office bearer tharte leh Executive Committee member tharte pawm a ni a; chairman thar chu Rev. R Vanlalnghaka, Synod moderator niin, nimin aṭang khan chairman kal chhuak hnen aṭangin president mawhphurhna a la a ni.

Ṭhutkhawmah hian NTCP, Mizoram hotute'n vaihlo zûk leh hmuam ṭhat lohzia inzirtirna hun an hmang a; NTCP state nodal officer Dr H Lianthangpuia leh state consultant R Lalremruata ten thil pawimawhte an sawifiah. MKHC leh NTCP Mizoram thawhho theih dan tur sawiho a ni bawk.

MKHC hian kum 2022 leh 2023 chhungin thuchhuah (press release) vawi sarih an tichhuak. April 6, 2022 khan Mizoram Liquor (Prohibition) Rules, 2022 hmang lo tura ngenna Chief Minister hnenah an thlen.

Uniform Civil Code (UCC) hmang lo tura ngenna March 2, 2023-ah Governor kaltlangin India Prime Minister leh Home Minister hnenah an thlen a; kumina Mizoram inthlanpui vote chhiar ni atana ruat December 3 chu Pathianni a nih avangin sawn tura ngenna Election Commission of India-ah October 10 leh November 7-ahte an thlen bawk.

MKHC hi August 13, 1982-ah din niin, chutih lai chuan Zoram Kohhran Hruaitute Committee tih a ni a, April 2, 1998-ah Mizoram Kohhran Hruaitute Committee tia thlak a ni.