Opposition-te'n sorkar puih kan tum - Opposition Leader

Nimina Assembly session-ah Governor thusawi vanga lawmthu sawina motion sawihonaah opposition leader Lalchhandama Ralte chuan, eptu lamte'n an theih ang tâwkin sorkar puih an tum thu a sawi.

Lalchhandama Ralte chuan, tun ṭuma Governor thusawi chu Mizoram Assembly House-a Governor thusawi awm tawhah eptute pawhin ngaihnawm páwl tak a ni tih an rilrua a awm thu a sawi a, "Khatianga sorkar hi an kal theih dawn chuan mipui beisei angin an kal dawn tihna a ni. Mahse, an fimkhur a ngai dawn hle. Sorkar thar thâwm a lian a, mipui pawh an phûr a ni," a ti.

Kum hnih vel a kal hunah mipui beisei an pha ang em tih ngaihtuahnaah a awm thu sawiin Lalchhandama chuan, "Balloon hmangte'n kawng kan chei a, a tirah a puar lian a, a tûkah a thêp leh ṭhin. Eptu lam pawhin kan theih ang tâwkin puih kan tum, thu tisaah a chan theih nan, kawng hrang hrangin hma kan la dawn," a ti a, ram leh hnam tana ṭha zawka rawng an bâwl an duhsak tak zet thu a sawi.

Opposition Leader chuan, tuna Chief Minister-in kum 2018 Assembly session-ah Governor-in sorkar thar ngaih pawimawh leh an tih turte an sawi chhuah ṭhin thu a sawi tih sawiin, "Governor thusawiah power lama hmalakna tur te, ramri chungchanga hmalakna tur te, development chungchang te, quarantor-a sorkar ṭan tur thute leh an ram buaina avanga Zo hnahthlak unaute chungchang a lang lo hi mak ka ti," a ti.

OPPOSITION LEADER SAWI DANGTE

▶ Thlai chi leina atan cheng vbc. 110 dah leh health care atana cheng vbc. 40 dah kha SEDP hnuaia chhungkaw 60,000-in an dawn tura dah kha a ni em?

▶ Sorkar langtlang leh fel a awm theihna atana dik taka an kal theihna atan duhsakna ka hlan.

▶ Kan sorkar hian an ram buai vanga harsatna tâwk kan unaute thlamuan thei se ka duh.

▶ Sorkarin inrenchemna kalpui a tum ka thláwp. Chutih laia sorkar hmasain a din sum tam tak hmuchhuaktu Resource Mobilization department ni 100 chhunga ṭhiah tura tih hi ngaihtuahna fím tak hmanga thutlukna a ni em?