Ruihhlo donaah kan ṭan tlàn a ngai - Excise Minister

Excise & Narcotics minister Lalnghinglova Hmar chuan, Mizoram dinhmun thlirin ruihhlo donaah Mizoram mipui ṭan tlàn a ngaih thu a sawi.

Lalnghinglova Hmar hian nimin Assembly session-ah ruihhlo do chung­chang sawiin, "Engtin nge kan kal dawn, engtin nge kan beih dawn sawi vak a la rem lo. Ka chungah a tla a, member zawng zawngte ṭawi­awm­na ka ngen. Mahni bial ṭheuhah, mahni hmazawn ṭheuhah ruihhlo i do ang u," a ti.

Ruihhlo donaah mipui a sáwm tih sawiin Minister chuan, "Tun ang ringawt hian kan ram kan hnut­chhiah a thiang lo. Ruihhlo hlauhawm ber heroin a zalen em emna ram, ṭhalaite an ruihna ramah kan ram kan hnutchhiah thiang lo," a ti a, ruihhlo donaah sorkar bán chauh a chak tâwk theih loh thu a sawi.

Lalnghinglova Hmar chuan ruihhlo donaah kohhran leh tlawmngai pawlte sáwmin, "Kan zavaia ṭan tlan a ngai, kan beih tak tak a ngai," a ti a, ruihhlo donaah political party, kohhran, chhim, hmar, chhak leh thlang inthliar loa ṭan tlanpuiah Mizo mipui a sáwm a ni.