College zirtirtute'n inkhawmpui an hmang

Mizoram College Teachers’ Association (MCTA) chuan nimin khan Aizawl College, Mualpuiah General Conference vawi 44-na an hmang a, Higher & Technical Education minister Dr Vanlalthlana'n a hmanpui.

Dr Vanlalthlana chuan, sorkarin college zirtirtute tehfung thar, Faculty Grading System kalpui a tum thu sawiin, "Hei hian zirtirtute ṭan a laktir piah lamah, zirtirna kawngah nasa takin a pui thei dawn. College-ah zirnain hma a sawn thei nan NAAC accreditation a pawimawh a, hmasawnna lam hawiin ṭan la zel ang che u," a ti a; research leh research project pawimawhna kalpui zel tur leh ṭang turin college zirtirtute a fuih.

School Education, Higher Eduaction leh National Education Policy lama hmachhawp leh a pawimawhnate sawiin Minister chuan, higher education-in system thar a mamawh thu te, infrastructure tihchangtlung a ṭulna te, state university din a pawimawhna leh hmalak an tum thute a sawi bawk.