Eco-Friendly Grand Campfire buatsaih

Aizawl District Bharat Scouts & Guides chuan nimin khan Central YMA Hall-ah Eco - Friendly Grand Campfire an buatsaih a, Art & Culture minister C Lalsawivunga'n a hawng.

C Lalsawivunga chuan, Scouts & Guides-te'n Eco-Friendly Grand Campfire an buatsaih chu ṭha a tih thu sawiin, "Scouts & Guides hi khawvela pawl lian ber, mi maktaduai 33 vel awmna, nungchang ṭha inzirna hmun leh khawhawi zauna remchang tak a ni a, he movement-a dan leh thutiamte hi zawm vek ila chuan jail pawhin luahtu a nei lo thei hial ang," a ti.

Kal khawmte chu thawk rim tura chahin Minister chuan, "Scouts & Guides danin min phût angin khua leh tui ṭha ni a, mi rintlak, rinawm, aia upa zah thiam, thu dika huaisen ngam ni ila, inren thiamin kan ngaihtuahna thianghlim se," a ti a; Scouts & Guides kaltlangin ram leh hnam siamṭhat hna thawk tur leh taima taka hna thawka hlawhtlinna hmuh tum turin a sáwm.

Campfire-ah hian Bharat Scouts & Guides state chief commissioner Lalnunhlua pawhin thu a sawi. Aizawl district-ah scouts & guides 1,143, unit leader 72, tritya sopan 345 leh rajya puraskar 154 an awm mek a ni.