KHAWTHLIR

Dy. Speaker Lalfamkima

Nimina Assembly session-ah 9th Legislative Assembly of Mizorama deputy speaker atan Lalfamkima chu chuhtu awm loa thlan a ni. Lalfakima hi Kolasib bialtu MLA a ni a, deputy speaker tur hian ZPM member H Ginzalala'n a rawt a, ZPM member dang Jeje Lalpekhlua'n a thláwp a ni.

Ram pum huap Tawngtai rual

Mizoram Kohhran Hruaitute Committee chuan December 16 (Inrinni) emaw, December 17 (Pathianni) emawah kohhran tinah ram pum huapa ṭawngṭai rualna hun hman an rêl. Ṭawngṭai thupui atana an ruahmante chu - MLA inthlanpui tluang taka neih leh vote chhiar ni sawn a nih vanga lawmthu sawina, ram hruaitute'n Pathian duh dana ṭha leh dik taka ram an hruai theih nan leh Krismas leh kumthar tluang tak leh muanawm taka hman a nih theih nante a ni.

KTP-in thisen pe

KṬP, Ramhlun Sports Complex Branch chuan nimin khan Synod Hospital Blood Bank-ah thisen unit 10 an pe a, petute mipa pakua leh hmeichhia pakhat an ni.

Kawlphetha pe thei dawn lo

December 16, naktuk zing dar 9 aṭanga chawhnu dar 1 inkarah Chawnpuia Power sub-station-ah hna thawh a ni dawn a, hei vang hian Chawnpui, Vaivakawn, Kanan, Hunthar Veng, Chanmari West, Dawrpui Vengthar, Tuikual, Dinthar, Tuikhuahtlang, Khatla, MINECO, Bungkawn, Bungkawn Vengtharahte kawlphetha pek a ni dawn lo.

Pisa luah lut

Mizoram State Legislative Assembly pakuanaa opposition leader Lalchhandama Ralte chuan nimin khan Assembly Secretariat Annexe building-a a pisa a luah lut a; "He dinhmun hi ka awmna tura Pathianin a ruat a nih ngei ka beisei a, ram leh mipui tan sorkar khalh ngil turin theihtawp chhuah ka tum ang," a ti. The Mizoram Salaries and Allowances of the Leader of Opposition Act, 1999-in a tarlan danin, Assembly House-a opposition leader-te chu hlawh leh hamṭhatnaah cabinet minister tlukpui a ni.

Kawng siam dawn

Nimin aṭanga January 2024 thleng Edenthar aṭanga RIPANS péng, Zemabawk inkar kawngpui thawm ṭhat hna thawh a nih dawn avangin Aizawl Traffic SP Stephen Lalrinawma chuan kawngpui chanve zel khar a ni dawn tih a tarlang a; hnathawh tibuai thei tura kawngpui dunga lirthei leh bungrua dah khap a nih thu a tarlang bawk.

Táng tlânbo man

Ruihhlo vanga thiam loh chantir tawh Central Jail-a táng, damdawi-ina a awm laia tlanbo Vanlalvena, Bawngkawn chu December 13, Nilaini khan Zokhawtharah man a ni. Vanlalvena hi a dam loh avangin Greenwood Hospital, Aizawlah dah a ni a, chuta ṭang chuan a tlanbo a ni.

Fimkhur turin chah

Aizawl district magistrate Nazuk Kumar chuan Krismas leh kumthar thleng turah in chhung tihlumna (room heater) leh in chhung chei mawina êng (decoration light)-te hman chungchangah electric current kalsual vanga kângmei leh chhiatna thleng thei laka fimkhur turin mi tin a chah.

Tanpuina sem

Chief minister Lalduhoma chuan Chief Minister Discre­tionary Grant 2023-24 aṭangin December 13, Nilaini khan district 11-a damdawi-in, home leh centre hrang hrang 90 tan Krismas thilpek Rs 2,45,000 a pe chhuak. Ṭanpuina sumte hi district tina DC-te kaltlangin sem a ni ang.