Kum 2023 chhungin Mizoramah Dengue vei 1,939; mi 2-in an thihpui

Mizoramah kumin chhungin dengue vei mi 1,939 hmuh chhuah tawh a ni a, hmuh chhuah tam ber kum a ni tawh. Dengue vangin mi pahnih an thi tawh bawk.

Health Services department chhinchhiah danin, kumin January aṭanga December 3 thleng khan Mizoramah mi 12,215-te thisen endik aṭangin dengue vei mi 1,939 hmuh chhuah a ni tawh a, endik zinga 15.87%-in dengue an vei.

Kum 2023-a dengue vei hmuh chhuah tawh zat 1,939 chu kum 2022 chhunga hmuh zat 1,868 aiin 71-in a tam tawh zawk a; kum 2022 khan mi 5,252 endik niin, chu'ng zinga 35.57% chuan dengue an vei tih hmuh chhuah a ni.

Mizoramah dengue vanga thi kum 2022-ah an awm ṭan a, mi pasarih an thi tawh. Kum 2022-ah khan mi panga an thi a, kumin 2023-ah mi pahnih an thi tawh a ni.

Health department hotute chuan, dengue vei damlote enkawlna bik damdawi a awm lo tih tarlangin, "A natna lan chhuah dan ang zela enkawl dam chi a ni," an ti a; khawsik, lu ná leh mitmu ná, taksa/tihrâwl leh ruh chuktuah ná, sentût anga vuna bawl sen awm, chaw ei tui lo, pum ná, luakchhuak, kawṭhalo, chau ngawih ngawih leh, hnár leh ha hni aṭanga thisen chhuakte chu doctor ráwn vat turin an chah.

Natna laka inven chu mi tin mawhphurhna a ni tih tarlangin Health department chuan, "Dengue hi thihpui theih natna a ni a, ngaihthah loh tur a ni," an ti.

Health department tarlan danin, dengue natna hriat chhuahna (test) atan ELISA khawl hmanga en ngei lo chu pawm a ni lo a, ELISA hmanga a thlâwna thisen endikna Civil Hospital, Aizawl leh Lungleiah a awm. Private laboratory - Genesis Lab., Lal Path Lab., Ding Dong Lab. leh Life Line Lab.-ahte pawisa chawiin ELISA khawl hmangin endik theih a ni bawk.