Guwahati-a Red Ribbon Quiz-ah Republic Veng PES an thiam ber

India ram puma zirlaite quiz hmanga an inelna, Red Ribbon Quiz kal mekah December 14, Ningani khan Guwahati-ah regional level-a inelna buatsaih a ni a, Mizoram aiawha kal Presbyterian English School, Republic Veng pakhatna an ni.

Regional Red Ribbon Quiz-ah hian state pariat an tel a, Mizoram bakah, West Bengal, Sikkim, Manipur, Arunachal Pradesh, Nagaland leh Assam aṭangin an state ṭheuha pakhatnate an tel.

Intihsiakna pangngaiah Mizoram aiawha telte hi Assam aiawha telte nen point 105 ve ve hmuin, a chung berah an awm a, tie breaker neih zui niin, Mizoram an chak ta a ni.

Mizoram aiawha tel Republic Veng PES zirlaite hi Janet Malsawmpuii, College Veng leh Zonunsangi, Republic Vengthlangte an ni a, an zirtirtu Zonunpuii Khawlhringin a hruai. Mizoram aiawha an kalna senso zawng zawng hi Mizoram State AIDS Control Society (MSACS)-in an tum a ni.

Red Ribbon Quiz hi district level-ah neih hmasak niin, district tina pakhatna ṭheuh chu state level-ah an intihsiak a, state level-ah hian Republic Veng PES aiawh Janet Malsawmpuii leh Zonunsangi te hi pakhatna niin, Mizoram aiawha kal zel tura thlan an ni.

Regional level-a pakhatna Republic Veng PES zirlaite hi National Red Ribbon Quiz-ah an tel leh dawn a, a hun leh hmun tur erawh tihchian a la ni lo.