Sorkar sum harsatna tiziaawm turin Taxation kan ṭan a ngai - Taxation Minister

Taxation minister Dr Vanlalthlana chuan nimin khan a pisaah Taxation department hotute a kâwm a; Mizoram sorkarin sum harsatna a tawh mek tiziaawm turin Taxation department-in ṭan an lak a ngaih thu a sawi.

Dr Vanlalthlana chuan, Taxation department chu Mizoram sorkar tana sum hai luttu department lian ber a nih thu a sawi a, "Tuna Mizoram sorkarin sum harsatna a tawh mek tiziaawm turin ṭan kan lak a ngai a, hei hi a hlawhtlin theihna tur chuan mipuite'n chhiah chungchang an hriatthiam a pawimawh," a ti.

Chhiah chu mipui pek khawm, sumdawngte'n sorkara an chhùn ve leh chhàwn a nih thu sawiin Minister chuan, "He sum tling khawm bawk hi mipui leh ram hmasawnna atana hman leh ṭhin a ni a, mipuite'n hrethiam se ka duh hle," a ti a; department hotute chu mipui hnena chhiah pawimawhna sawi tam turin a chah.

Ṭhutkhawma tarlan danin, Taxation department hi zone 15-ah ṭhen a ni a, district tinah zonal office a awm a, Aizawl district-ah zone pali a awm. Zonal office-te chu Commissioner of State Tax kaihhruaina hnuaiah an awm a ni.

Kum 2022-23 chhungin Taxation department-in chhiah cheng vbc 1,020.66 a hmu a; sorkar kum kal mek 2023-24 ah November thla thleng khan cheng vbc 734.60 a hmu tawh. Taxation department-in kum 2020-21 chhunga State’s Own Tax Revenue-a a pek chu 90.68% a ni.