Education leh MSACS-in MoU an ziak
High school leh higher secondary school zirlaite'n an zirlai bakah, hriselna leh nunphung dik an zir tel theih nan School Education department leh Mizoram State AIDS Control Society (MSACS) chuan nimin khan thawh dunna thuthlung an ziak.
Sorkar chuan H/S leh HSS-ah pawl 8, 9 leh 11-ah zirlaite'n an zirlai bakah hriselna leh nunphung dik an zir tel theihna turin Adolescence Education Programme (AEP) a ruahman a, hun eng emaw chen Mizo-ramah kalpui a lo ni tawh. Tunah hian tharthawh leh turin School Education secretary Dr Lalzirmawia Chhangte leh MSACS project director Dr Lalthlengliani te chuan thawh dunna thu-thlung an ziak a ni.
AEP-ah hian Ministry of Health & Family Welfare leh Ministry of Human Resources & Development ten Ayushman Bharat hnuaia School Health Programme an ruahman zûlzuia kalpui tura ruahman a ni a; School Health Programme kalpui turin National Health Mission (NHM) leh SCERT-te nen thawkho tura ruahman a ni.
Sorkar sikul bikah chuan NHM-in hma an la mek a; nimina thuthlung ziah tâk, MSACS leh School Education thawh dunna turah chuan private H/S leh HSS-ahte kalpui a ni ang.