BJP MP nei tura ṭan la turin inchah

BJP, Mizoram Pradesh president Vanlalhmuaka chuan, kum 2024-a Lok Sabha inthlanpui awm turah hian BJP-in Mizoramah MP an neih ngei theihna tura rilru siam tur leh hma la turin an party mite a chah.

Nimina Mizoram BJP pisa kharna inkhawmah thu sawiin Vanlalhmuaka chuan, "Kum 2024 Lok Sabha inthlan awm turah hian BJP-in Mizoramah BJP MP kan neih theih ngeina turin BJP member-te'n kan rilru siam thar ila, BJP MP Mizoramin kan neih ngei theih nan hma la a, MP thil ti thei tak tak Mizoramin kan neih theih nana hma min lâkpui turin Mizoram mipui pawh kan sawm a ni," a ti.

Vanlalhmuaka chuan, BJP mi leh sate chu Pathian aw hria a, Bible leh ṭawngṭai thlahthlam lo tura chahin, "Bible leh ṭawngṭai thlahthlam lo kan tam poh leh kan chak dawn a, chutiang mi chu BJP hruaituteah kan awm tam a ngai. Pathian nena inzawm tlat nun neitu hi BJP Mizoram hruaitu atan kan pawimawh a ni," a ti a; insiamṭhat an ngaihna apiangah mahni insiamṭha turin an party mite a chah bakah, Krismas leh kumthar hlim taka hmang turin duhsakna a hlan a ni.

BJP, Mizoram Pradesh pisa hi kumin chhung atan nimin khan khar a ni a, January 8, 2024-ah hawn leh a ni ang.