Tourism Minister leh officer-te inkâwm

December 14, Ningani khan Tourism minister Lalrinpuii hoin a pisaah Tourism department hotute'n an department hmalakna, harsatna leh hmachhawpte an sawiho. Minister chuan, sorkara chhiah chhùn luhah ṭan lak a ṭul thu leh langtlang taka hmalak a pawimawh thu a sawi.

Lalrinpuii chuan, tourism chu industry a nih angin tourism kaltlanga sum leh pai thawh chhuah lamah hmasawnna a awm theih nan ṭan lak a ṭul thu sawiin, "Siamṭhat ngai lai zawn chhuaha siamṭhat hna thawh leh hmasawnna a awm theih nana zir chian ngai laite zir chian hi thil ṭul hmasa ni. Tourist lodge thawm ṭhat ngaite a rang thei ang bera bawhzui a ṭul," a ti.

Tourism department chu tourism chawisàn leh tihhmasawnna lama hma latu leh mi dang tana kawng kawhhmuhtu pawimawh tak a nih thu sawiin Minister chuan, tourism kaihhnawiha inhnamhnawih hrang hrangte thawhpui thiam tur te, ṭhahnemngai taka thawk tur leh rinawm taka thawk ṭhin turin department officer-te a fuih a ni.