MZP hruaitu hlui MLA-a tlingte MZP-in lawmpuina an hlan

MZP General Headquarters chuan nimin khan an conference hall-ah MZP hruaitu hlui, kumin inthlanpuia MLA atana thlan tlinte lawmpuina an hlan.

MZP-in lawmpuina an hlante chu kum 1993-1995 leh 1996-1997 chhunga MZP president Lalmuanpuia Punte leh kum 2001-2003 chhunga MZP president Lalchhandama Ralte bakah, MZP Executive Committee member hlui Lalrinsanga Ralte te an ni a; lawmpuina thuchei leh tawlhlohpuan an hlan a ni.

MZP president H Lalthiang­hlima chuan, MZP-in zirlai mangang leh puih ngaite puitu nih zel an tum thu a sawi a, "Ram leh hnam leh zirlaite innghahna tlâk ni zel turin theihtawp kan chhuah a, MZP pisapui hi khâr mah ila, zirlaite leh ram leh hnamin min mamawhna zâwnah chuan engtik lai pawhin hawn reng theih a ni," a ti a; MZP hruaitu hlui MLA-a tlingte chu an kal zelna turah duhsakna a hlan.

MZP hian an pisa hi kumin 2023 chhung atan nimin khan an khâr a, January 16, 2024-ah an hawng leh dawn a ni.