Mizo subject zirtirtute inkhawmpui

University leh college-a Mizo subject zirtirtu inzawmkhawm pawl, Mizo Literature and Language Teachers Academy (MILLTA) chuan nimin khan Aizawl North College-ah inkhawmpui an hmang a, Mizo Language Development Board chairman R Lallianzuala khuallian a ni.

Inkhawmpui chawhma lam chu MILLTA vice president Lalrammawia Ngente-in a kaihruai a, secretary Dr H Laldinmawia'n pawl chanchin leh hmalakna a sawi. R Lallianzuala chuan, Mizo Language Development Board hmalakna aṭangin A AW B chu tihdanglam a ṭul theih thu a sawi a; Board ṭhutkhawm hmasa berah Mizo ṭawng tihhmasawnna atan Grammar Cell, Orthography Cell leh Research and Docu­mentation Cell din rawt a nih thu a sawi bawk.

Chawhnu inkhawm chu MILLTA president Prof. C Vanlalhruaia'n a kaihruai a; 'Tun hnaia Mizo literature dinhmun: Harsatna leh hmathlir' tih thupui zirho a ni.

MILLTA inkhawmpui hi adviser pahnih Prof. Laltluangliana Khiangte leh Prof. RL Thanmawia ten an hmanpui bawk a; an member pahnih, Ph.D nei thar hnenah chawimawina an hlan bakah member pahnih pension-a chhuakte an thlah. MILLTA-ah hian member 119 an awm mek a ni.