Vote tlâk ṭhatna YMA lawmman hlan

Khawzawl District Election Office leh YMA, Sub-Headquarters, Khawzawl inremna thuthlung bawhzuiin nimin khan Khawzawl DC meeting hall-ah vote tlak ṭhatna polling station awmna YMA branch-te hnenah lawmman hlan a ni.

Kumina MLA inthlanpuiah Khawzawl district-a MLA bial awm chhun Tuichang bialah vote a tlâk ṭhat theih nan Khawzawl District Election Office chuan YMA Sub-Headquarters nen inremna an siam a; YMA branch-te chu an chanchinbu leh aurinna hmangin vote thlak tura mipui ngenna puangzar turin an ti a, intlar ngai loa vote thlak theih dan tur YMA branch-in an ruahman bawk.

Tuichang bialah kum 2018 inthlan-puiah vote 80.07% a tla a, kumin inthlanpuiah chuan vote 84.49% a tla. Lawmman pakhatna dawngtu YMA, Hmuncheng Branch hnenah Rs 12,000 hlan a ni a, pahnihna Tlangmawi Branch hnenah Rs 7,000 leh pathumna Arro Branch hnenah Rs 5,000 hlan a ni.