RD Minister-in department hotute a kâwm

Rural Development minister Prof. Lalnilawma chuan nimin khan Secretariat conference hall-ah Rural Development department hotute a kâwm a; department a enkawl pathumtea hmalaknate a ṭul anga kaih kawp (converge) a nih dawn thu a sawi.

Prof. Lalnilawma chuan, sorkar tharah eirûkna awm lo (corrup­tion free) sorkar siam an tum thu sawiin, depart­ment a enkawl pathum - Rural Development, Public Health Engineering leh Horticulture depart­ment-a hmalaknate a ṭul leh remchang anga kaih kawpa kal kawppui a nih dawn thu leh tuihna humhalh leh tihpun lamah uar zawka kal a nih tur thute a sawi a ni.

Eirûkna leh hlemhlêtna do turin sorkar official-te nen an thawhho a ngaih thu sawiin Lalnilawma chuan, "Kut hnathawktute leh thingtlang mi harsate dàwmkàn leh chàwikàn chu department thil tum ber a ni. Theihtawp chhuaha hna kan thawh a, budget-te ṭha tak leh dik taka kan hman chuan change kan siam theih ngei ka beisei," a ti.

Inkawmhonaah hian RD department hnuaia scheme hrang hrang - MGNREGS, PMAY-G, PMKSY-WDC, BADP, SAGY, SAU, leh SIRDPR hnuaia hmalakna leh hma­­chh­awpte thlirho a ni.