Mi duh turin kan insiamṭha dawn - Lalsawta

Mizoram Pradesh Congress Committee President chuan, ZPM chu mipuiin enchhin an duh a, an enchhin hma chuan mipui rilru a dam dawn lo nia sawiin, Congress party chu mipuiin duh rih lo mah se, mipui duh turin an insiamṭhat dawn thu a sawi.

Kumin chhung atana Congress Bhavan khàrna inkhawm nimina neihah Lalsawta chuan, "Congress hi beidawnga ṭhu mai mai thiang kan ni lo. Kan tlakna sang mah se, kan bei zel dawn a, kan tho leh dawn a ni. Miin min duh rih lo mah se, mi duh turin kan insiamṭha ang a, kan hmaah hian beiseina êng a awm a, chu chu kan zui zel dawn a ni," a ti.

Lalsawta chuan, Mizoram inthlanpui neih zawh takah beiseina sang tak an nei tih sawiin, "Mahse kan beisei ang kan ni pha ta lo. Mipuite'n ZPM enchhin an duh a, an enchhin hma chu an rilru a dam dawn lo. Thinlung takin ka lawmpui a, sorkar ṭha an siam chuan kan sorkar nen a inang reng a ni," a ti a, sorkar hotute tana ṭawngṭai turin party mite a chah. Krismas leh kumthar hlim taka hmang turin an party mite duhsakna a hlan bawk.

Congress party aṭanga MLA awm chhun C Ngunlianchunga pawhin thu sawiin, "Politics-ah hian tu pawh kan khingpui an ni ang. Kan khingpuite nen mimal inhuatna neih loh tur a ni a, kei pawhin ka khingpui lo ni tawhte nen mimal inhuatna kan nei ngai lo a, tun hnuah min puitute an lo ni zawk," a ti.

C Ngunlianchunga chuan, a bial, Lawngtlai West chhungah MDC bial 11 a awm a, Congress party MDC bial pakhat mah a awm lo tih a sawi a, "Pathianin min hruai a, hnehna min chantir a, ka lawm em em a ni," a ti a; politics-ah seat a la dil ngai lo a, a din tawh chuan tu mahin an chuhpui ngai lo bawk niin a sawi.

Inkhawmah hian C Ngunlianchunga hnenah MPCC, Congress hmeichhe pawl leh zirlai pawlte'n lawmpuina an hlan a ni.