MNF sorkar tla hi Pathian remruat a ni - Zoramthanga
MNF party chuan nimin khan an pisa, Mizo Hnam Rûnah Exodus Day an hmang a, lawmthu sawina leh sual thupha chàwi ṭawngṭai hun an hmang. MNF president Zoramthanga chuan, MLA inthlanpuia MNF sorkar a tlak chhan chu Pathian remruat vang a nih thu a sawi.
Zoramthanga chuan, "Pathianin kan phurrit min chhâwk turin tuna sorkar thar hi a ruat a ni. MNF sorkar tla hi Pathiam remruat a ni. MNF kalkawngah hian Pathian remruatna kan chhiar thiam a ngai. Hei aia harsatna nasa zawk pawh a lo thleng ang. Kan hnam thuthlungah hian nghet takin i ding tlat ang u," a ti.
MNF sorkar kal ta chungchang sawiin Zoramthanga chuan, hripui léng vangin sum harsatna nasa tak an tawk a, sorkar laipui aṭanga hmuh tur cheng vbc. 3,000 vel an hmu lo niin a sawi a, "Leiba chhîpchhuàn ang reng kan ni a, nasa taka beih kan tâwk a, development, candidate neih ṭhat pawhin awmzia a nei tawh lo," a ti a, an phurrit chhâwk turin Pathianin tuna ZPM sorkar chu a ruat ta niin a sawi.
MNF President chuan, December 16, 1971-ah Dhaka (East Pakistan) aṭanga hnam pasalṭhate chhanchhuahna ni ropui chu Exodus Day tih a nih thu a sawi a, "Khami ní khan Pathianin kan ṭawngṭaina chháng lo se, Pu Denga leh a hote kha hmelma kutah kan thi vek ang a, kan hnam movement hi a tàwp daih tawh ang... MNF hi Pathianin chak takin a siam ngai lo. Dinhmun sangah min dah pawhin min hnûk thla leh ṭhin, kan chapo loh nan," a ti.
MNF adviser Dr R Lalthangliana pawhin thu sawiin, hripui léng leh hun khirh hmachhawn turin Pathianin MNF a dah nia sawiin lawmawm a tih thu leh, East Pakistan aṭanga tlân chhuahna kawng awm lo aṭanga Pathianin MNF sipaite a chhanchhuah dan chu ropui a tih thu a sawi.
R Lalthangliana chuan, Mizoram state nih hnuah pawh MNF-in harsatna hrang hrang a hmachhawn tih sawiin, "Inthlanah kan chak cháng a awm a, na taka kan tlâk cháng a awm. Hun harsaah Pathianin min hruai ṭhin... MNF hi political party a ni mai lo, hnam party - hnam movement kengtu a ni," a ti.
Exodus Day hmannaah hian Mizoram tana martarte sûnna hun hman a ni. Nimin vêk khan Mizo Hnam Run hi kumin 2023 chhung atan khàr a ni a, January 15, 2024-ah hawn ṭan leh a ni ang.