KHAWTHLIR
Thisen pe
CZ Higher Secondary School NSS chuan nimin khan Kolasib District Hospital Blood Bank-ah thisen unit 10 an pe a, petute mipa pasarih leh hmeichhia pathum an ni. YMA, Kolasib Tuiṭha Veng Branch pawhin nimin khan District Hospital-ah unit sarih an pe a, petute mipa panga leh hmeichhia pahnih an ni.
Advance christmas
Mizoram Journalists' Association (MJA) Gen.Hqrs chuan vawiin hian Aizawl Press Club-ah Advance Christmas an hmang dawn a, chawhnu dar 1-ah ṭan tur niin, an member-te tel vek turin an hriattir. Krismas puala hun an hman hmain an member pahnih - K Sapdanga (president hlui) leh Lalnghinglova Hmar te MLA atan thlan an ni leh minister an nih avanga lawmpuina an hlan dawn a, MJA member atana lak tharte lawm luhna hun hman a ni bawk ang.
Dy Speaker pisa
Legislative Assembly deputy speaker thar Lalfamkima chuan nimin khan Assembly Secretariat building-a a pisa thar a luah lut a, pisa luah ṭan pualin Pathian hnena inhlanna hun hman a ni. Lalfamkima chuan, Assembly Secretariat-a thawktute ṭawiawmna fakawm a tih thu a sawi a; ram siam kawngah theihtawp chhuahpui tur leh finchhuah turin kal khawmte a sawm. Inkhawmah hian minister B Lalchhanzova pawh a tel a ni.
Governor-in tanpui
Governor Dr Hari Babu Kambhampati chuan nimin khan Mizoram district 11-a orphanage home leh charity home 40 hnenah Krismas leh kumthar lawmna pualin Governor's Discretionary Fund aṭangin ṭanpuina Rs 10,000 ṭheuh a hlan. Ṭanpuina pek chhuah zawng zawng chu Rs 4,00,000 a ni.
PHBS graduation
Presbyterian Hindi Bible School chuan nimin khan Mission Vengthlang Kohhran Jubilee Hall-ah Graduation Day vawi 71-na an hmang. Inkhawm hi PHBS principal Rev. Zochhuanmawia'n a kaihruai a, result puan niin, zirlai ti ṭhate hnenah lawmman hlan a ni.
Hmanrua hlân
Champhai District Disaster Management Authority chairman James Lalrinchhana, bawrhsap chuan nimin khan YMA Sub-Headquarters, Champhai hnenah chhiatna a thlen thulha hman tur chhanchhuahna hmanraw chi hrang hrang a hlan. Hmanraw hlane chu leilàwn (thleh tawi theih) pakhat, metre 50-a sei hrui pahnih, search light pahnih, head light paruk leh surgical glove báwm khat a ni.
Polling station chungchang sawiho
Aizawl District Standing Committee on Rationalization of Polling Station chu nimin khan additional DC Isaac C Lalrempuia hoin DC conference hall-ah an ṭhukhawm a; Zemabawk North, Vaivakawn, Salem Veng, Chawnpui leh Tuikual South aṭanga polling station hming thlak leh hmun sawn dilna an sawiho. Dilna panga zinga pali chu a thuphungin an pawm a, a hmunah enfiah a ni ang.
MHSSP sawiho
Mizoram Health Systems Strengthening Project (MHSSP), Mizoram Project Director-in a hriattir angin nimin khan Khawzawl District Hospital meeting hall-ah Stakeholder Consultation Meeting neih a ni. Khawzawl Chief Medical Officer pisa sak thar chu hun rei lo tê-ah Health department kutah hlan a nih dawn thu tarlan a ni. Ṭhutkhawmah hian Health department-a thawk te, MJA leh tlawmngai pawl aiawhte an tel.
CM tanpuina hlan
Chief Minister Discretionary Grant 2023-24 aṭanga Krismas thilpek ṭanpuina Khawzawl district-a dawngtu - Khawzawl District Hospital, Chhanchhuahna Home leh Grace Camping Center-te hnenah district bawrhsap K Lalrohlua chuan nimin khan Rs 2,000 ṭheuh a hlân.