Sawhthing leh hmarcha lei turin thawhhona thuthlung ziah a ni

Mizorama thar sawhthing leh hmarcha leina turin Zawlnghak Farmer Producer Company, Sialkal Farmer Producer Company leh Staunch Enterprise, Tinsukia, Assam-te chuan December 16, Inrinni khan Chief Ministers' Conference Hall-ah inremna thuthlung an ziak a, CM Lalduhoma'n a telpui.

Inremnaah hian sawhthing leh hmarcha leitu tur aiawhin Ernst & Young senior consultant Bishak Roy Chaudhury-a'n hming a ziak a, Ministry of Agriculture & Farmers' Welfare hnuaia Project Management Unit consultant Chinmoy Hait chu hriatpuitu a ni.

Inremna hi Clover Organic, Dedradun buaipuina hnuaia ziah a ni a, sawhthing metric ton 500 leh hmarcha metric ton 100 leina tur a ni. Sawhthing leh hmarcha leina man tur erawh chu January 2024-ah sawifel tur a ni thung.

Zawlnghak FPC hian Mizorama loneitute thar sawhthing leh hmarcha an hralh (supply) dawn a, Sialkal FPC chuan sawhthing chauh an hralh thung ang.

CM Lalduhoma chuan, thlai thartute'n man man taka an thlai an hralh theihna tura hma latu company-te chungah a lawm thu a sawi a; inremna anga ṭha taka insumdawn tawnna an kalpui theih nan duhsakna a hlan.

Clover Organic senior vice president Sanjay Kumar chuan, loneitute tana rate ṭha tur ang zela ruahmanna kalpui an tum thu a sawi.