MJA-in an member MLA-a tlingte lawmpuina leh chawimawina an hlân

Mizoram Journalists' Association (MJA) Gen.Hqrs chuan December 16, Inrinni khan Aizawl Press Club-ah Advance Christmas an hmang a, MJA member pahnih - K Sapdanga leh Lalnghinglova Hmar-te MLA-a an tlin avangin lawmpuina an hlân.

MJA hian an member zinga MLA atana tlin mi pahnih hnenah hian thuchei (citation) leh Rs 10,000 ve ve an hlan a; K Sapdanga hnenah India rama working journalist upa ber Lalbiakthanga Pachuau-in hlanin, Lalnghinglova Hmar hnenah prominent journalist DR Zirliana'n a hlan thung.

K Sapdanga hi MJA hruaitu hlun niin, kum 2006-2010 chhung president a ni a, MJA chuan kum 2021 khan prominent journalist-ah a puang. Lalnghinglova Hmar pawh MJA member a ni mek. Aizawl Press Club sound system tihchangtlunna atan Lalnghinglova Hmar-in Rs 10,000 a pe a, senso dangte a tum tur thu K Sapdanga'n a puang bawk.

MJA president C Lalrambuatsaiha chuan, kumina MLA inthlanpuiah MJA member pali an ding tih sawiin, "Pahnih an tling a, pahnih an tling zo lo. Kan member pahnih an tling hi kan lawm em em a, minister an ni ve ve leh zel a, kan lawm tak zet a, MJA min timawitu an ni. MJA-in manganna kan neiha kan hmachhuan turte an ni a, kan thla an timuang hle," a ti a, an kal zelna turah duhsakna a hlan.

C Lalrambuatsaiha chuan, Krismas hunpuiah Isua lam hawi tura MJA member-te chahin, "Thinlung leh tih tak zeta a lam kan hawi a ṭul. Chhungkuaa hun hman a ṭha a, nupui fanaute nen chhungkuain lal thar chibai i bûk ang u," a ti.

K Sapdanga chuan, MJA-in lawmpuina a hlan chu hlu a tih thu sawiin, "MJA-a kan inthlun khawmna hi a nghet a, a hlu tak zet. Chanchinbu hi politics-a ka kêuna a ni a, ram rorelna pawimawhzia ka hriatna a ni," a ti a; department a enkawl, a bikin Home department kaihhnawihah chanchinbumite nen an thawhho nasat a ngai dawn tih sawiin, theihtawp chhuaha amah thláwp turin MJA member-te a ngen.

Lalnghinglova Hmar pawhin thu sawiin, "Chanchinbumi ni lo ila tun dinhmun hi ka thlengin ka ring lo, media hi ka tan a hlu hle. Minister ni tura thutiam kan lâk tawh avangin media lama tel zel a rem tawh rih lo a, chanchinbu khawvel ka chhuahsan a ngai rih dawn a, awm thiam a har dawn hle," a ti. Mizoramah ruihhlo a hluar tak zet a, ruihhlo vanga thi an am ber kum a ni tawh tih sawiin, "Ruihhlo hluar ber lai kan tawng mek. Ruihhlo hi nasa taka do a ngai a, theihtawp chhuah a ngai dawn a, in mi finchhuah ka ngai hle dawn. Ṭha taka kan thawhho ka beisei," a ti bawk.

Inkhawmah hian MJA member atana tun hnaia lak luhte lawm luhna hun MJA President-in a hmang a; intihhlimna hun hman a nih bakah, zanriah an kîlho a ni.