Winter Fest & Mega Exhibition khâr a ni

Tourism department-in Lammuala Winter Festival cum Mega Exhibition an buatsaih chu December 16, Inrinni chawhnu khan khar a ni a; Art & Culture minister C Lalsawivunga'n hmanpuiin, ṭhalaite chu tourism industry hmanga eizawnna siam tuma ngaihtuahna séng turin a chah.

C Lalsawivunga chuan, mipuiin eizawnna atan tourism industry an hman ṭangkai chuan sum lak luhna ṭha tak a nih theih thu a sawi a, "Ṭhalaite'n tourism industry hmanga eizawnna siam tumin ngaihtuahna seng ang che u. Khualzin hìp leh Mizo culture vawnhim kawngah Art & Culture department leh Tourism department ten theihtawp chhuahin hma kan la zel dawn a, mipui thlàwpna leh ṭawiawmna kan mamawh," a ti.

Minister chuan, "Factory leh industry lian nei lo mah ila, khualzinte hìpna tur siam chawp ngai loa ram mawi leh nuam kan neih sa hi kan chhawr ṭangkai thiam a ngai," a ti a; sorkar laipui leh Mizoram sorkarin tourism chawisan an ngaih pawimawh thu leh sorkar hmasa hmalakna pawimawh tak takte pawh theihtawp chhuaha chhunzawm zel an tum thu a sawi.

Winter Festival-ah hian tour package siam a ni a, chumi kaltlang chuan mahnia zin senso aia tlem zawka zin theihna ruahman a ni. Exibition-ah stall 100 siam a ni bawk.

Tourism department tarlan danin, ni tin exhibition stall aṭangin Rs 9,00,000 leh food stall aṭangin Rs 10,00,000 vel a lut anga chhût a ni a; festival chhunga sum lak luh chu Rs 1,00,00,000 vel tling tura chhût a ni. Stall luah man leh a dangte aṭangin Tourism department-in Rs 10,00,000 vel a hmu thei tura chhût a ni bawk.

Vanglaini palaiin a hmun a tlawhnaa a lan danin, Winter Fest hi zan lamah pawh buatsaih a ni a, zaithiamte an zai ṭhin. Chhun lamah aiin zan lamah chhimtu an tam zawk a, zanah mi an tam avangin Raj Bhavan gate bawr vel aṭanga Zarkawt kâwn leh Chanmari thlengin traffic jam a nasa ṭhin hle a ni.