Viksit Bharat Sankalp Yatra lirthei vailiam

Governor Dr Hari Babu Kambhampati chuan December 16, Inrinni khan MINECO Open Gym kawt aṭangin Viksit Bharat Sankalp Yatra atana district hrang hrang lirthei hman turte a vailiam.

Viksit Bharat Sankalp Yatra hi mipui hamṭhatna tur central scheme-te a dawng turte'n an dawn kim vek theihna tura khaw hrang hrang kal chilh a, inzirtirna leh inziah luhna tura sorkar laipui hmalakna a ni.

Lirthei vailiam hmain prime minister Narendra Modi hoin kumin kum tawpa MLA inthlanpui neihna state panga - Rajasthan, Madhya Pradesh, Chhattisgarh, Telengana leh Mizoram tan Viksit Bharat Sankalp Yatra tlangzarh a ni a; sorkar laipui chuan Mizoram tan Viksit Bharat Sankalp Yatra pualin lirthei (Information, Education & Communication van) 17 a rawn tír a ni.

IEC van hi Aizawl district tan pathum leh Lunglei district tan pahnih ruahman niin, district dang zawngah chuan van pakhat ṭheuh tirh a ni a; spare van leh recovery van pakhat ve ve a awm bawk.

Khaw tin tlawh chhuaka sorkar laipui scheme inhrilhfiahna leh inziah luhna hi January 26, 2024 thleng neih tur a ni. Inrinni vêk khan Lunglei, Serchhip leh Hnahthial district hotute chuan an district-a hman tur IEC van-te an kalna hmun tur khua ṭheuhah an vailiam bawk.