Hmabak êng takin min hmuak - CM

Tualpui Welfare, Aizawl chuan December 16, Inrinni khan an patron member Lalduhoma, chief minister chu CM bangla-ah an chawimawi. Chief Minister chuan, "Hmabak êng takin min hmuakin kan hria," a ti.

Lalduhoma chuan, chawimawina an dawn vanga a lawm thu a sawi a, "Politics ka luh aṭanga tun dinhmun ka thlen theihna tura min thláwp tlattute vawiina in hmel ka hmu hi ka lawm hle. Inṭawiawmna ṭha tak tel lo chuan politics-ah hian a hlawhtlin theih loh," a ti a, thawhhona a ṭhat chuan hlawhtlinna hmuh a nih ṭhin thu a sawi.

Pathian malsawmna an dawn zawng zawngte sawi sen a nih loh thu sawiin Duhoma chuan, "Sorkarna kan siam aṭanga tun hun rei lo tê chhung pawhin Pathian awmpuina kan dawng nasa em em a, hna ṭha takin kan la thawk zel a, kan lawm em em a ni. Sorkar hnathawk hlawh leh health care bill tang eng emaw zat kan pe nghal," a ti.

A kaihhruai sorkar chu mipuiin beiseina sang tak nen an thlir tih sawiin Lalduhoma chuan, "Min beisei ang ngei hian ṭha taka thawh kan tum. Pathian zara kan dam chuan kum thar lamah central lama kan hruaitute nen Mizoram mamawh sawiho tura inbuatsaih ka tum a, hmabak kan ngah hle," a ti.

Chief Minister chuan, Governor pawhin a phûrpui thu sawiin, "Theihtawp min chhuahpui tur thu min hrilh. Hmabak êng takin min hmuak niin kan hria a kan lawm hle a ni," a ti a, tih tur tam tak an neihah ṭawiawm tur leh ṭawngṭaipui turin mipui a ngen.

Tualpui Welfare chairman TC Lalremsiama chuan, "Tualpui khuain hun lawmawm tak mai kan tawng a, kan khaw tlangval in chief minister dinhmun hial luah a, ram rorelna dinhmun sang ber a thleng hi kan lawmpui em em a, inthlan result an han puang a, hmun hrang hranga Tualpui khaw chhuak mi leh sate lawm avangin kan mittui a tla hial a ni," a ti.