Gorkha ṭhalaite'n inkhawmpui an hmang

Mizoram Gorkha Youth Association (MGYA) chuan December 16, Inrinni khan Zotlang Sports Complex-ah inkhawmpui vawi 46-na an hmang a, minister of state Lalnghinglova Hmar-in a hmanpui.

Lalnghinglova Hmar chuan, Gorkha-te chu an rinawmna, huaisenna leh thuawihna avangin an hmingṭha a, an hmingthang tih sawiin, "An chenna apiangah ram leilung fate nen inngeih takin leh inpawh takin an chengho a, an awmna khawtlang tan an thawh hlâwk zel a, an fakawm hle," a ti a; chu chu chhawm nung zel tur leh Mizoram tan theitawp chhuah zel turin Gorkha ṭhalaite a chah.

India sipaiah Gorkha mi 35,000 vel an awm tih sawiin Minister chuan, "Hei hian an pawimawhzia a tilang hlein ka hria," a ti a; "Mizorama Gorkha-te'n Mizoram bak ram in nei lo a, Mizoram bak hmangaih tur dang in nei lo a, chuvangin, Mizoram siamṭhat kawngah, hma­sawnna kawngah in rilru leh theihna zawng zawng sêng zel u la ka duh," a ti.

Lalnghinglova Hmar chuan, sorkar hna a tlem zel avangin Gorkha ṭhalaite chu sorkar hnaa innghat loin, company leh private lamahte hna zawng uar turin a chah a, ṭawng pahnih/pathum an thiam chu an tan awlsamna siamtu a nih thu a sawi a; a department chan LESDE chu hmang ṭangkai thiam turin a fuih bawk.

MGYA hi kum 1977-ah din niin, Mizoramah sub-headquarter pakhat leh branch 17 an nei a, member 4,000 vel an awm mek a ni.