KHAWTHLIR

Tanpuina hlân

Governor's Discretionary Fund aṭanga Krismas puala ṭanpuina pek chhuah zinga Khawzawl district-a pek tur Rs 10,000 chu bawrhsap K Lalrohlua'n December 16, Inrinni khan Chhanchhuahna Home, Zuchhip hnenah a hlan. Chhanchhuahna Home hi kum 2020-ah din a ni a, ruihhlo ngai mi 30 enkawl mek a ni.

CYMA-in tanpui

Central YMA chuan Aizawl khawpui huam chhunga home, centre leh damdawi-in hrang hrang 27-ah December 15, Inrinni khan Krismas pual thilpek an hlan. CYMA-in ṭanpuina a pek zawng zawng hi Rs 1,85,000 a ni.

Dawr endik

Champhai Town Vending Committee chu an chairman James Lalrinchhana, DC hoin December 16, Inrinni zingah khan Champhai khawpuia phalna nei lo leh kawng tichêp zawnga kawngpui sira inzuar (street vendor) an awm leh awm loh an endik a; thil zawrh phal lohna hmunahte hriattirna an tár. Dawr hrang hrangah hman khat daih sarâng (single use plastic) zuar an awm leh awm loh an enfiah nghal a, zuar an hmuhte chu an man a ni.

Damdawi sem dan tur rêl

Khawzawl DC K Lalrohlua hoin December 16, Inrinni khan a pisaah Every Infant Matters, New Delhi aṭanga vitamin-A leh rúlhût hlo an dawnte sem dan tur sawiho a ni. Khawzawl district tana mamawh zat tur chhût chhuah hnuah a bâng a awm chuan Champhai district leh Saitual district hnenah pek an rêl. Every Infant Matters aṭang hian vitamin-A mûm 1,00,000 leh rúlhût hlo (deworming) mûm 1,50,000 an dawng a, a vaiin Rs 16,00,000 man a ni a, kum 2024-ah sem ṭan tum a ni.