Amit Shah-a'n Bru-te a lawmpui
Mizoram aṭanga tlân chhuak Bru, Tripura camp-a awm mekte Tripura state-a an awm hlenna tura January 16, Ningani tlaia New Delhi-a inremna ziah chungchangah Union Home minister Amit Shah chuan, Bru mipuite a lawmpui thu a sawi.
Home minister Amit Shah hian Facebook-a a page-ah Bru chungchang hi tarlangin, January 16, 2020-a sorkar laipui, Mizoram sorkar, Tripura sorkar leh Bru pawlte'n inremna an ziah tâk chu kum 23 chhung Bru mi 34,000 velte harsatna chinfelna a nih thu a tarlang a, "Bru raltlânte hi Tripura state chhungah an inbéngbel ang a, Modi-a sorkar chuan anmahni chhawmdawl nan leh hma an sawnna turin cheng vbc. 600 a ruahman a ni. Tripura state mi pangngai angin an awm ang a, sorkar aṭanga mipui hamṭhatna turte pawh an chang ve thei dawn a ni," a ti.
Amit Shah chuan, Bru chhungkaw tin hnenah Rs. 4,00,000 ṭheuh, in sakna tur ram ft. 30X40 ṭheuh, kum hnih chhung free ration leh thla tin Rs. 5,000 ṭheuh, in sak ṭanpuina Rs. 1,50,000 ṭheuh pek an nih tur thu a sawi a; in an sakna tur ram chu Tripura sorkarin a ngaihtuahsak tur thu a tarlang bawk.