Home Minister leh Excise Minister ruihhlo do kaihhnawihah an zin dûn; 'Ram siamṭha turin sorkar a hmanhmawh' - HM

Home minister K Sapdanga leh Excise & Narcotics minister Lalnghinglova Hmar te chu ni 100 chhunga sorkar ngaih pawimawh ruihhlo do kaihhnawihah nimin khan zan khat riak turin Champhai an tlawh. Home Minister chuan, ram siamṭha turin sorkar a hmanhmawh thu a sawi.

Home Minister leh Excise Minister hian Champhai an pannaah Saitual leh Khawzawl an tlawh nghal a, sorkar official leh khawtlang hruaitute an kâwm. K Sapdanga chuan, ram siamṭha turin sorkar a hmanhmawh a, ṭhahnem a ngai tih sawiin, "Sorkarin theihtawp chhuah a duh," a ti.

K Sapdanga chuan, Champhai chu thil ṭha chhuahna a nih rualin thil chhe chhuahna a nih tel thu sawiin, "Mizoramin a buaipui ruihhlo kalkawng lian ber a ni," a ti a; khawtlang hruaitute leh sorkar hruaitute nen ruihhlo ven theih dan tur chu an rilrua lian ber a nih thu a sawi.

Dan loa kuhva rah hmanga sumdawnna chungchang sawiin Minister chuan, "Kuhva rah ro chu Mizoramin a thar chhuahte hralh chhuah zawh phawt a nih hnuah ram dang aṭanga lak luh chu a hnuhnungah buaipui theih dan a awm dah lo maw tih kan rilruah a awm," a ti.

K Sapdanga chuan, ruihhlo leh dan phal loh thilte chu sorkar leh police chakna ringawt chuan do hneh rual a nih loh thu sawiin, "Champhai aṭangin Mizoram then thianghlim kan tum dawn. Khawtlang nena lungrual taka do a nih chuan ruihhlo hi do hneh theih a ni," a ti a, ruihhlo donaa thawhhopuiah mipui a sâwm.

Zin veivahnaa inhmuah, inchawimawi leh inzâwnte awm lo se tih chu an hotupa duh dan a nih thu sawiin Minister chuan, "Ka zinna hmunahte kan duh dan min zawmsak avangin lawmawm ka ti hle a ni," a ti.

Home Minister chuan, an hmalakna hrang hrang a hlawhtlin theih nan khawthlang leh pawl hruaitute thawhpuiah sáwmin, "Dan rorelna tun dina a awm theihna turin kan police lam pawh ṭhahnemngai taka thawk turin ka chah duh che u," a ti a, tlawmngai pawlte pawhin sorkar hmalakna nasa lehzuala an ṭawiawm a beisei thu a sawi bawk.

Excise & Narcotics minister Lalnghinglova Hmar chuan, CM-in thapui thawhin ruihhlo do a nih tur thu a sawi tawh tih sawiin, "A changtu minister ka nih avangin mawhphurtu ber ka nihna chin a awm. Khawtlang hruaitu te, party hruaitute leh tlawmngai pawl hruaitu zawng zawng ṭawiawmna kan mamawh dawn a ni," a ti.

Ruihhloin Aizawl mai ni lo, thingtlang thlengin ṭhalaite nun a ei chhe nasa tih sawiin Lalnghinglova chuan, "Ruihhlo do beihpui kan thlâk a ngai dawn a, he ram leh hnam hian chhan a ngai," a ti a; Mizoram chawk buai mektu ruihhlo donaah mi tin an thawhho a ṭul thu a sawi bawk.

Home Minister leh Excise Minister hi Saitual DC conference hall-ah sorkar department hotute leh khawtlang hruaitute nen an inkâwm a; Khawzawlah chuan 2nd IR Headquarters-ah Khawzawl bawrhsap K Lalrohlua kaihhruaiin sorkar hotute nen an inkawm. Champhaiah chuan Circuit House-ah sorkar department hotute nen an inkâwm a, Champhai North bialtu MLA Ginzalala leh Champhai South bialtu MLA Lt.Col. Clement Lalhmingthanga te pawh an tel.

Vawiin hian Zokhawthar an pan dawn a, Land Custom Station, Immigration Check Post, Bethel Refugee Camp leh Lipui Refugee Camp-te an tlawh ang.