January 2024 daih tur buhfai khâwl ṭan; Buhfaiah sum hloh a tam - FCSCA Minister

Food, Civil Supplies & Consumer Affairs (FCSCA) minister B Lalchhanzova chuan, January 2024 thleng daih tur buhfai chhêk khâwl mek a nih thu a sawi a, "Buhfaiah sorkarin sum a hloh nasa hle, sum hloh tihtlem dan zawn a ngai," a ti.

Thuthar thehdarhtute zawhna chhangin B Lalchhanzova chuan, sorkarna an chan hnuah theihtawp chhuaha hma an lak nghal thu a sawi a, "A bikin hunpui lo thleng turah mipuite'n buhfaiah harsatna an neih lohna turin theihtawp chhuah a ni," a ti a, December 2023 atan thlaphànna tur a awm loh thu a sawi.

FCSCA Minister chuan, January thleng daih tur buhfai leina tur Food Corporation of India (FCI)-ah pek a nih tawh thu sawiin, "January daih tur buhfai phurh mek a ni a, kudam hnawh khah ngaite hnawh khah mek zel a ni. January daih chhêk khâwl zawhah fûr atan inbuatsaih leh nghal a ni ang," a ti.

Supply Minister sawi danin, tun dinhmuna Mizoram sorkarin buhfai a neih zat chu quintal 28,187 a ni a, state sorkar kudamte tikhat vek turin quintal 9,054 la mamawh a ni. Buhfai la mamawh zat leina tur FCI-ah pek tlak a ni tawh a, kudam hrang hrangah dah mek zel a ni.

Non-NFSA (card var)-te ration buhfai pekna atan sorkarin sum a sèn belh nasa tih sawiin Minister chuan, "Sorkarin thla khatah cheng vbc. 7 vel a hloh ṭhin a, kum khatah chuan cheng vbc. 84 vel a hloh. Non-NFSA-te ration buhfai tur hi kg. khat Rs 34 vela lei a nih laiin, Rs 15-a khultir an ni," a ti.

B Lalchhanzova chuan, non-NFSA atana sum hloh chu a chanve tala tihhniam a ṭul hle tih sawiin, "Cheng vbc. 40 vel kan hum theih chuan mi harsa zawk leh sorkar hnathawkte pawhin ṭangkai takin an hmang thei dawn a ni," a ti a; mi harsa zawkte tana harsatna siam chuang si loin non-NFSA atana sum hloh tihtlem dan ngaihtuah mek a nih thu a sawi.

AAY (card eng) leh priority household (card pawl)-a Mizoram quota hnawhkhah a la nih loh thu sawiin Minister chuan, "Card var neihah hian harsa tak tak an awm a, chu'ng mite chu card eng emaw, a pawl emaw an neih dan tur ngaihtuah a, a bak, neinung deuhte chuan sorkarin buhfai a khulna angin khul ve mai se tihte ngaihtuahnaah a awm," a ti.

FCSCA Minister sawi danin, tun dinhmunah card var nei Mizoramah chhungkua 1,12,722 (mi 4,72,248) an awm a, chu'ng zinga ṭhenkhat chu card pawl emaw, card eng emaw nei àwm tak takte an ni.