IPR Minister leh officer-te inkâwm
Information & Public Relations minister Dr Vanlalthlana chuan nimin khan a pisaah IPR department hotute a kâwm a, chhuanlam ṭha tak awm loa aikal lâk leh lirthei kawl theih chin bâk kawl chungchangte ngai pawimawh turin a chah.
Dr Vanlalthlana chuan, thawhhona ṭha tak neih a beisei thu sawiin, "IPR department hi sorkar thuchhuah mipui tana hriat tur ṭulte puangzartu leh zirtirna petu pawimawh tak a nih avangin thawktute inthlahdah loa ṭhahnemngai taka thawh a ngai," a ti a; sorkar duh dan angin office inkaihhruaina dante ṭha taka zawm a nih theih nan hma la tura chahin, "A chhan leh finfiahna ṭha tak awm loa aikal lâk leh lirthei kawl theih chin bâk kawl chungchangte ngai pawimawh ang che u," a ti.
Pisa cheibâwl leh thawm ṭhat a ṭul hunah tualchhunga thil siam leh Mizo kutchhuak ngei hmang hrâm hrâm tura chahin Minister chuan, "Mizoram dinhmun leh hmasawnna te, state páwn lam mite tana entawn tlak chìn dan ṭha leh mawite tarlan tam a pawimawh," a ti a; ram leh mipui tana rawngbawlnaah rinawm leh dik taka hmalak a nih theih nan theihtawp chhuaha hmalakho zel a ṭul thu a sawi.
Inkawmhonaah hian IPR secretary HM Hualsangi, director C Lalnunkima leh officer-te'n an hmalakna tlangpui leh hmachhawpte an tarlang a; mamawh leh ṭul an sawite chu a remchan anga bawhzui zel a tum thu Minister chuan a sawi.
IPR officer-te chuan, thlalak hlu tak takte nakin zel atana awlsam zawka en lêt theih tura vawn him dan tur te, Mizoram Calendar 2023 leh diary-te tun kar tàwp lamah a rawn thlen hman beisei a nih thute an sawi a ni.