Aizawl khawpui aṭangin ni tin bawlhhlawh qtl 1,081.8 paih ṭhin

Aizawl Municipal Corporation (AMC) chuan December 16, Inrinni khan Aizawla bawlhhlawh paih lirthei khalhtute a ko khawm a, bawlhhlawh paih chungchanga hriat tur pawimawhte an hrilhfiah. Aizawl aṭangin ni tin bawlhhlawh quintal 1,081.8 paih ziah ang a nih thu tarlan a ni.

Inkhawm hi AMC joint commissioner Lalremruata Kullai-in a kaihruai a; AMC executive corporator Laltlanzova Khiangte-in thu sawiin, chawhrualin Aizawl khawpui aṭangin ni tin bawlhhlawh ton 108.18 (quintal 1,081.8 / kg. 1,08,180) paih ṭhin ang a nih thu a sawi.

Laltlanzova Khiangte sawi danin, chawhrualin Aizawl khawpui aṭangin ni tin bawlhhlawh ṭawih thei (wet waste) ton 32.92 leh ṭawih thei lo (dry waste) ton 75.26 paih ṭhin a ni. Local council 85-a bawlhhlawh paihna atan bawlhhlawh paih lirthei (garbage truck) 151 hman mek a ni a; bawlhhlawh paihna atan AMC-in thla khatah cheng nuai 45-58 vel a hmang ṭhin a, kum 2023 chhungin Rs. 4,91,19,342 (vbc. 4.91) a sêng tawh.

AMC commissioner Lalhriatpuia chuan, bawlhhlawh paih lirtheia bawlhhlawh chu khuh ngei tur a nih thu sawiin, khuh lote chu Solid Waste Management Bye Laws, 2019 No. 4.3 leh 10 (1)(3) hmangin Rs 5,000 chawitir theih a nih thu a sawi.

Lalhriatpuia chuan, a hmun loa bawlhhlawh paih leh Solid Waste Management Center (SWMC) thlen loa hmun danga bawlhhlawh thehthang leh hralhte chu Rs 5,000 chawitir theih a nih thu te, Aizawl khawpui vawn fai kawngah lirthei khalhtute nen thawhho a pawimawh thute a sawi bawk.

Inkhawmah hian Transport department leh Traffic Police aṭangin driver-te hriat tur pawimawhte sawifiah a ni a; hawihháwm taka lirthei khalh ṭhin tur te, mi dang tana harsatna siam lo zawnga bawlhhlawhte khawn khawm ṭhin turin an chah a ni.