ZPM President-in mahni ṭánghma hâina thinlung dah bo turin a chah

ZPM president Lal­liansawta chuan nimin khan an party pisa kumin atana khârna inkhawmah thu sawiin, mahni ṭánghma hâina thinlung dah bo a, ram siamṭha tura insang phek turin an party mite a chah.

Lalliansawta chuan, "Kan lo sorkar ve ta a, ram siamṭhat kan tih kha keimahni mawhah a lo tla ve ta. Tua pawh hi ZPM party mite emaw tu pawh ni se, ram siamṭha tura thawkho zawng zawngte kha insang phek ila, mahni ṭánghma hâina thinlung dah bo ila. Mihring ve tho kan nih avangin heti lam hi sawi a ṭul ve tho a, keimahni tan leh kan chhungkaw tan tih ringawt hi ram siamṭhat nan a tâwk lo a ni," a ti.

ZPM aṭanga MLA-a thlan tlinte leh tling zo ta lote pawh ZPM party nen an inzawm ṭha hle tih sawiin Lalliansawta chuan, "Ka chah duh chu, party hi rawn ngaihsak hle rawh u, tih a ni," a ti a; a tam thei ang ber party-ah lang turin ZPM MLA-te a chah.

Minister Vanlalhlana pawhin thu sawiin, opposition leader Lalchhandama Ralte-in constructive opposition nih a tum thu a sawi tih a sawi a, "Ṭha takin kan kalho thei ngei ang tih ka ring. Ram rorelnaa Pathian ram din tih hi kan party thil tum hmasa ber a ni a, secular rama Pathian ram din tih hi a harsatna sawi awm ṭhin mah se, Pathian ram din turin sorkar kalpui kan tum," a ti.

Vanlalhlana chuan, ZPM kaihhruai sorkarah mipui an lawm a, mipuiin beiseina an nei sang tih sawiin, "An mi beisei ang kan phâk loh chuan kan ram chu kal ngaihna a váng tawh ngawt ang. Kan politics khelh dan a dang hret hret a, insawiselna ringawt hi ṭhalaite'n an ngaisang tawh lo. Sum hmatheha inthlan hmachhawn hian awmzia a nei thui tawh lo hle tih a chiang," a ti a; bial tin deuh thawah ZPM khingpuite'n sum an chelek chungin sum vanga chak an tlêm hle niin a sawi.

ZPM President-in mahni ṭánghma hâina thinlung dah bo turin a chahThusawitu dang Lalthansanga, ZPM vice president leh minister chuan, ZPM-in harsatna leh tih fuh tâwk lo nei ṭhin mah se, Pathianin a hualhim tih a sawi a, "Kan kalkawngah hian eng lai maha kan theihnghilh loh tur chu Pathianin min hruai a, kan party leh ram tana ṭawngṭai ngat ngat ṭhinte kan neih rah a ni tih hi kan theihnghilh loh a ṭha ang," a ti.