Minister-in ZPM power policy sawipui

Power & Electricity minister F Rodingliana chuan nimin khan a pisaah depart­ment hotute a kâwm a, ZPM power policy a sawipui.

F Rodingliana chuan, ZPM thil tum lian ber chu ram rorelnaa Pathian ram tun din a nih thu sawiin, "Kan thil tihnaah Pathian ram tana thawk kan ni tih kan inhriat chuan corruption kan tih hi chu a bo mai dawn. ZPM policy chu sorkar policy a nih tawh avangin department lamte pawh in ngaihven a, a hlawhtlinna tura theitawpa hma min lakpui turin ka sáwm che u," a ti.

ZPM policy chu an kal­kawng hruaitu a nih tawh dawn avangin hriat chian a ngaih thu sawiin Rodingliana chuan, "Kan ràwn fo a ngai dawn. Kan lo kal tawh dan nena inrem lo deuh a awm a nih pawhin kan kalphung thar zir chungin kan inráwn tlang zel ang," a ti a; a ṭul a nih chuan dan tharte pawh duan mai tur a nih thu a sawi.

Power & Electricity Minister chuan, policy chu action plan-in a zui dawn thu sawiin, "Project-in kan ûm nghal dawn. Chumi tur chuan kan infinchhuah a, kan inṭawngṭaipui tawn a ngai a ni," a ti.

Inkawmhonaah hian kawlphethaa intodelhna tur chungchang te, chak zawk leh ṭha zawka PE department-in mipui rawng a bàwl theihna tura rawtnate leh a bikin solar power leh hydro-electric power ramin a thar chhuah tihpun dan tur te, Krismas leh kumthar hunpui thleng tura khaihlak loa mipuite'n kawlphetha an neih theih dan turte sawiho a ni.