Vietnam mi jail-a awm lak chhuah a ni : TNT, Muanna Vengah a awm rih dawn

Vietnam ram mi Dahn Niang, kum thum chuang (thla 43 vel) Serchhip District Jail-a awm tawh chu nimin khan jail aṭanga lak chhuah niin, Thutak Nunpuitu Team (TNT) hmun, Muanna Vengah dah luh a ni a, Vietnam Embassy-in an lak hma chuan a awm rih dawn.

Centre for Environment and Social Justice (CESJ) tarlan danin, Dahn Niang hi CESJ hotute chuan Serchhip District Jail aṭangin an la chhuak a, TNT camp-ah an dah lut a ni. New Delhi-a Vietnam Embassy-in an lak hma chuan TNT-ah a awm rih dawn a, a legal guardian chu social activist Vanramchhuangi a ni.

Dahn Niang hi taksa leh rilru lama harsatna nei a ni a, April 24, 2020 khan Serchhip District Jail-ah dah luh a ni. Foreigners Act tlawhchhanin thubuai siamsak niin, July 29, 2021 khan thiam loh chantir a ni a, kum hnih chhung tang tur leh Rs 10,000 chàwi tura hrem a ni. Pawisa a chawi loh chuan thla hnih dang tàn belh tura tih a ni bawk.

Dahn Niang hian jail-a a tàn hun pangngai leh pawisa a chawi loha a tan belh turte Serchhip Jail-ah a tlâk vek tawh. Jail-ah a nungchang a ṭhat vanga ngaihhnathiamna (remission) pekte nen June 23, 2022 khan jail aṭanga chhuak thei a ni tawh a, mahse, kalna tur a neih loh vangin Serchhip Jail-ah a awm zui ta zel a ni.

Home department chuan Dahn Niang chanchin chu sorkar laipuia Ministry of External Affairs-ah an thlen a, MEA lamin Vietnam Embassy lam an hriattir bawk a; Vietnam Embassy chuan Dhan Niang chu an ram mi leh sa ngei a ni tih an finfiah a ni. Amah hi Vietnam rama thingtlang khuaa cheng a ni a, Vietnam passport pawh Embassy lamin an siamsak tawh niin an sawi.