KHAWTHLIR

Tanpuina thawh

Mizoram Government Secondary School Teachers' Association chuan Chief Minister's Relief Fund-ah Rs 10,000 an thawh a, nimin khan chief minister Lalduhoma hnenah an hlan.

Zirlai chawimawi

MZP sub-headquarters, West Lungdar chuan nimin khan kum 2022-23 a an bial chhunga zirlai hlawhtlinna chang mi 17 hnenah chawimawina an hlan. He hunah hian MZP president H Lalthianghlima, West Lungdara middle school, high school leh PES school zirlaite leh khawtlang nu leh pate an tel a ni.

W Phaileng tlawh

Dampa bialtu MLA Lalrintluanga Sailo chuan nimin khan a bial chhunga West Phaileng a tlawh a, West Phailenga khawtlang hruaitu leh party hruaitute nen Dinthar kâwnah hun an hmangho. Lalrintluanga Sailo chuan, West Phaileng leh Dampa bial hrang hranga khuate'n MLA ni leh tura an thlan tlin avangin a lawm thu a sawi a; Dampa bialin nasa zawka hma a sawn theih nan a theihna zawng zawng hman a tum thu a sawi bawk.

Mobile van vailiam

Sorkar laipui scheme hnuaia hamṭhatnate inhrilhfiahna leh inziah luhna tura hmalakna, Viksit Bharat Sankalp Yatra kalpuina tur mobile IEC van-te chu nimin khan Siaha, Champhai, Saitual leh Hnahthialahte district hotute'n an vailiam. Lirtheite hian an district chhung ṭheuha khaw tin an fang kual dawn a, an kalna a piangah sorkar laipui scheme kaihhnawih department aiawhte'n an ṭawiawm dawn a ni.

Jio fiber hawng

Champhai DC James Lalrinchhana chuan nimin khan Champhai Kahrawt YMA Hall-ah Reliance Jio fiber internet a hawng. Bawrhsap chuan, "Internet kaltlang hian thiamna, finna leh khaw hawi zaukan nei thei dawn a, office hrang hrang bakah mipuite'n awlsam zawkin hna kan thawk thei ang," a ti. Jio fiber hian Aizawl, Lunglei, Champhai leh Kolasib bakah, Vairengte leh North Kawnpui khuate a tuam tawh a ni.