Kum khat hnuah kan ziaawm chho hle turah kan inngai - CM

All Mizoram Centrally Sponsor Scheme Coordination Committee hruaitute chuan nimin khan chief minister Lalduhoma a pisaah an kâwm a; Chief Minister chuan, kum khat hnuah chuan sum lamah an ziaawm hle tura an inngaih thu a sawi.

CM Lalduhoma chuan, financial year tàwp lamah sorkarna an chelh ṭan tih sawiin, "Tun hnai lawk khan central lamin ni tina kan sum kawl theih zat a rawn titlem a, chuvang chuan chak taka kal theih a ni rih lo tih hi mipuite'n min hriatpui kan duh hle. Kan lo sawi tawh ṭhin angin kan state sum dinhmun ti ṭha turin nakkum hi inpuahchah kum (year of consolidation) atan kalpui kan tum," a ti.

Inren taka an awm tur thu sawiin Lalduhoma chuan, "Resource Mobilization Committee-in chak takin hma a la ang a, eirûkna awm loin kan kal bawk ang a, kum khat hnuah chuan kan ziaawm hle turah kan inngai. Hmanhmawh taka hnathawh nghal a harsa rih," a ti a; CSS-a thawktute'n mamawh thlente chu tun hma aṭanga a lo hriatpui leh a veipui takte an nih thu a sawi.

Chief Minister chuan, Mizoram CSS employee-te dinhmun chawikanna atana sorkarin a din study group zirchiannate a taka hmang tura chinfel ngaite a fel thuai theih nan naktuk meeting dawta Cabinet Meeting awm leh hmasa berah a lo chhawpchhuah tur thu All Mizoram CSS Coordination Committee hruaitute a hrilh.

Lalduhoma chuan, CSS hnate chak taka thawh a nih theihna atan state sorkar chuan central aṭanga sum lo kalte single nodal agency hnenah rang taka hlan zung zung a tum tlat dawn tih sawiin, "Kan thawh chaka utilization certificate (UC) kan pek thlak hma hian fund dang a lo thleng leh rang ṭhin," a ti.