Home Minister-in Zokhawthar a tlawh

Home minister K Sapdanga chuan nimin khan Zokhawthara Land Custom Station, Immigration Checkpost, Lipui Refugee Camp leh Bethel Refugee Camp-te a tlawh. Home Minister hi Excise minister Lalnghinglova Hmar, Champhai South bialtu MLA Lt.Col. Clement Lalhmingthanga leh sorkar official-te'n an ṭawiawm.

Home Minister chuan Zokhawthar a tlawh chhan sawiin, "Ramria harsatna awm ṭhinte a thawiin kan lo hre ve ṭhin a, a hmun ngeiah harsatna awmte en ila tiin kan lo kal a ni. Tunah hmalak nghal rum rum theih ni lo mahse kan theihna zawnah mipui harsatna sukiang turin hmalak kan tum ang," a ti.

Mipui harsatna benga an lo hriat ṭhin a taka a hmu chuan a tibengvar hle tih sawiin Sapdanga chuan, "Harsatna kan neihte ziakin felfai takin thuneitute hnenah thlen zel ang u," a ti a; official-te pawhin DC hoin ruahmanna ṭha tak an siam zel a beisei thu a sawi.

Lalnghinglova Hmar pawhin thu sawiin, "Raltlan kan unau, kan thisen zawmpuite helaiah tam tak an awm a, kan unaute hi kan thlahthlam thiang lo a, a theih ang anga chhawmdawl zel kan tum dawn a ni," a ti.

Home Minister leh amah ṭawiawmtute hian Myanmar buaina vanga Mizorama raltlan Bethel Refugee Camp leh Lipui Refugee Camp-a awm mekte an tlawh a, Krismas an hmanna atan pawisa an hlan. Camp pahnihah hian mi 1,093 an awm mek a ni.

Zokhawthar Land Custom Station hi March 15, 2015-ah Union Commerce & Industries minister of state Nirmala Sitharaman-i'n a hawng a, SASCI sum vbc. 15 hmangin tihchangtlun hna thawh mek a ni. Ṭiau lui kânna lei tihchangtlunna tur project cheng vbc. 14.5 senna tur pawh Ministry of External Affairs-ah thehluh tawh a ni bawk.

Home Minister leh Excise Minister te hian nimin vêk khan Champhai khawpuia sorkar pisa hrang hrang an tlawh. DPAR leh UDPA changtu K Sapdanga'n DC office, SP office leh UDPA office a tlawha; Lalnghinglova Hmar-in Sports department office leh Excise & Narcotics office a tlawh thung.