Hmeichhe naupang khuaikhemtu Court-in kum 20 táng turin a hrem

Kolasib district chhunga khaw pakhata hmeichhe naupang kum 5 mi khuaikhemtu Lalhlimpuia (37) s/o F Lalruata (L), Kawnpui chu Fast Tract Court, Kolasib chuan thiam loh chantirin, nimin khan kum 20 chhung jail-a táng tur leh Rs 5,000 chawi turin a hrem.

Thu dawn danin, pawikhawihna hi June/July 2020 vela thleng a ni a; Lalhlimpuia hian hmeichhe naupang chu âwi mu turin a paw ṭhin a, a puak zawhah a serh vel a khawihsak ṭhin, naupang chu sawi chhuak lo turin a vau ṭhin bawk.

Thil thleng ṭhin chu naupang chuan a nu hnenah hrilh mah se, a nu chuan a ngawihbopui mai ṭhin a; a hnuah hmeichhe naupang nu laizáwnin hre ve lehin, Kawnpui Police Station-ah FIR a thehlut a, Kawnpui police-te'n Lalhlimpuia chu an man ta a ni.

Police-te'n an chhui chiannaah Lalhlimpuia chuan hmeichhe naupang chu ṭum thum a khawih tih hmuh chhuah a ni a, medical examination report-ah finfiah a ni bawk.

Thubuaiah hian Kolasib Fast Tract Court judge R Vanlalena chuan nimin khan judgement & order a tichhuak a, Lalhlimpuia chu kum 20 chhung táng tur leh Rs 5,000 chawi turin a hrem a; pawisa a chawi loh chuan thla khat dang tàn belh turin a ti bawk a ni.