KHAWTHLIR

CM leh NIT hotu

Chief minister Lalduhoma leh National Institute of Technology, Aizawl director Prof. S Sundar chu nimin khan CMO-ah an inkâwm. Chief Minister chuan, NIT, Aizawlah politics nena inhnamhnawihna lam chi reng reng lakluh phal a nih loh thu sawiin, "Zirna-in ṭha leh rintlak a nih theih nan thawktu lâk leh thil dangah politics a inrawlh tur a ni lo," a ti.

Meizial tichhia

Champhai Customs Preventive Force, Aizawl Customs Division chuan December 18, Thawhṭanni khan Champhaiah ram dang aṭanga dan loa lak luh meizial tlâwn 1,98,17,600 chu Customs Act hnuaiah an tichhia. Meizial tihchhiatte chu Rs 25,63,28,800 man a ni.

JJM 98% zo tawh

PHE minister Lalnilawma chuan December 18, Thawhṭanni khan Secretariat conference hall-ah PHE hotute a kâwm a, PHE department-in scheme hrang hrang hnuaia project a thawh mek dinhmun a sawipui. Chhung tin hnena tui connection pekna tur Jal Jeevan Mission scheme chu January 26, 2024-ah zawh tum a nih thu leh hna 98% zawh a nih tawh thu sawi lan a ni.

Mobile van vailiam

Lawngtlai DC Joseph H Lalramsanga chuan nimin khan sorkar laipui hnuaia mipui tana hamṭhatna te zau zawka puan chhuahna tur, Viksit Bharat Sankalp Yatra moblie IEC van a vailiam. Van hian ni 23 chhungin Lawngtlai district-a khaw 46 a tuam dawn a, sorkar laipui hnuaia scheme 17 inhrilhfiahna hun hman a ni ang.

Pisa luah lut

Adviser to chief minister (political) Lalmuanpuia Punte chuan nimin khan Old Secretariat Building, Treasury Square-a a pisa a luah lut a; "Engmah nei loin, Pathian rin­chhanin ka kal tawp zel. Ka mamawh tâwk hi Pathianin min pe ṭhin," a ti.

MSAPwD din

Sports & Youth Services director Lalnunhlua hoin nimin khan a pisaah Persons with Disabilities (PwD) pawl hrang hrang hruaitute leh sorkar hotu dangte an ṭhukhawm a; infiamna lama vohbikte hmasawn theihna tura hma latu tur Mizoram Sports Association for Persons with Disabilities (MSAPwD) an din.

CYMA pisa khâr

Central YMA chuan nimin khan kumin chhung atana an pisa khârna inkhawm an buatsaih a, January 8, 2024-ah hawn leh a ni ang. CYMA vice president Lalnuntluanga chuan, Krismas leh kumthar hlim taka hmang turin Mizo mipui duhsakna a hlan.