Sum tihchingpen vangin CADC hotu hlui mi pariat court-in thiam loh a chantir

Cheng nuai 49.31 tihchingpen thubuaiah Aizawl District Court-a special judge (Prvention of Corruption Act) Dr HTC Lalrinchhana chuan nimin khan Chakma Autonomous District Council (CADC) hotu ṭhin mi pariat thiam loh a chantir a, vawiinah hrem dan tur puan a ni ang.

Court thutluknaa tarlan danin, February 14, 2003-a CADC inthlana Vaseitlang bial aṭanga MDC atana thlan tlin Buddha Lila Chakma chu chutih laia CADC chairman Gokul Chandra Chakma chuan MDC aṭangin a bàn a, Buddha Lila Chakma chu lungawi loin Gauhati High Court-ah a zualko a ni.

Gauhati High Court chuan May 7, 2008 khan thutlukna siamin, MDC aṭanga Buddha Lila Chakma paihthlakna chu a hnâwl a, MDC a nihna anga a chanvote pek leh vek turin thutlukna a siam.

June 1, 2018-a CADC Executive Committee ṭhukhawm chuan Buddha Lila Chakma hnenah bàn a nih chhunga MDC a nihnaa a chanvo tur cheng nuai 49.31 pe turin thutlukna an siam bawk.

ACB-in an chhui chiannaa a lan dan chuan, Buddha Lila Chakma hi CADC (Salary, Allowances and Pay of Members) Rule, 2003 anga a dawn theih chu cheng nuai 14.03 a ni a, CADC-in pawisa a pek zat chu cheng nuai 63.34 a ni thung a; cheng nuai 49.31 tihchingpen a ni.

Court chuan thuhretute thusawi leh finfiahna hrang hrang a zir chian hnuah Buddha Lila Chakma hnena sum dik lo taka pek chhuah a nih laia chief executive member Shanti Jiban Chakma leh CADC executive member dang pariat chu thiam loh a chantir a ni. Buddha Lila Chakma erawh chu October 10, 2023 khan a thih avangin a thubuai tihtawp a ni thung.