Hunpui thleng tur pualin Excise-in special drive an nei

Krismas leh kumthar thleng tur pualin Excise & Narcotics department (END) chuan special drive an kalpui mek a, ruihhlo tam tham tak an man tawh.

END thuchhuah tarlan danin, END minister Lalnghinglova Hmar hoa department officer-te'n ruahmanna an siam angin Mizo mipuite'n Krismas leh kumthar vuakvet thlamuang taka an hman theih nan district tinah special drive kalpui mek a ni.

Hunpui hman laia mipui him nan END chuan khualzin phur lirthei chi hrang hrang - bus, taxi, maxicab leh a dang khalhtute chu zu leh ruih theih thil dang an ruih leh ruih loh an endik ṭhin. Zu, ruihhlo leh a kaihhnawiha inhnamhnawih lo turin mipui an ngen bawk.

END hian December 1-19, 2023 chhungin rakzu litre 57,717.74, sapzu litre 1,026.45, beer litre 1,521.65, BEDC (Myanmar zu) litre 2, ram dang zu litre 126.50, heroin gram 764.560, ganja kg. 28.249 leh khuh damdawi phial 500 an man tawh a ni.